Рецензија: Борис Трајковски е убиен од ЦИА оти ја знаел вистината за военото профитирање
Објавено во Рецензии
on 20 - 11 - 2013 Автор: Оливера ВојновскаТекстот со сензационален наслов: „Борис Трајковски е убиен од ЦИА оти ја знаел вистината за военото профитирање“, нема апсолутно никаква допирна точка со вистината. Станува збор за целосно препишана стара информација објавена уште во февруари 2012 година на друг портал , при што е изменет само насловот. Овој copy-paste напис е објавен еден ден откако повеќето медиуми соопштија дека има нови моменти во истрагата за загинувањето на екс претсетадателот Трајковски. Нивните текстови се потпираа на веста што ја објави една телевизија со национална концесија и која нема врска со она што го објави порталот.
Линк до оригиналниот напис: Борис Трајковски е убиен од ЦИА оти ја знаел вистината за военото профитирање
Датум и време на објавување: 19.11.2013
Датум на рецензирање: 19.11.2013
Рецензент: Оливера Војновска
Вистинитост: Беспредметно е да се бара веродостојност на овој текст кој е целосно проблематичен и во спротивност со новинарските стандарди. Копија од вест стара речиси две години на читателската публика ѝ се продава како актуелна информација.
Извори на информации: Како извор е наведен друг портал, но не е ставен линк. Исто така, изворот е кажан само во поднасловот на „веста“:
„Претседателот Борис Трајковски бил убиен оти на високи западни државници им се заканил дека ќе обелодени компромитирачки информации за нивна вмешаност во корупција, за време на косовскиот конфликт и бегалската криза во 1999 година“- пишува сајтот МКД.
Понатаму во текстот никаде не се спомнува овој портал, па читателот добива впечаток дека изјавата е „тазе“ и дадена изворно за медиумот, односно за текстот што го резензираме.
„Игњат Панчевски, застапник на семејствата на загинатите во авионот со македонскиот претседател, потврди дека Трајковски поседувал документи кои би можеле да го нарушат авторитетот на некои западни дипломати кои во 1999 година одлучувале нешто во Македонија, за време на приливот на бегалци од Косово“,
Се вели во написот, а потоа целосно е пренесена изјавата на Панчевски дадена пред 21 месец! Препишан е и крајот на текстот објавен своевремено на овој сајт, каде е користена и изјава на поранешниот владин гласноговорник дадена за Нетпрес.
Порталот дури го користи и истиот прилог за време „вчера Нетпрес јави“:
„Точно е дека има најнов извештај и дека е пуштен во процедура. Детали не можам да изнесам оти станува збор за документ со доверлива содржина. Оттука извештајот ќе биде доставен до државното обвинителство, кое понатаму ќе одлучи дали и какви мерки ќе преземе“, изјави Мартин Мартиновски, портпарол на Владата.
Пренебрегнувајќи го фактот дека Мартиновски не е портпарол на Владата од јули 2012 година.
Содржајност: Тука и не може да се говори за некаква содржајност. Се работи за целосно препишан напис, без нови моменти.
Пристрасност: Со самото подметнување на информацијата, а особено со тврдењето изнесено во насловот, се искажува одредена пристрасност.
Оригиналност/Плагијат: Текстот е речиси е идентичен со оној што е објавен на друг портал.
Квалитет на насловот: Насловот на прв поглед делува шокантно. Тезата од насловот: „Борис Трајковски е убиен од ЦИА оти ја знаел вистината за военото профитирање“, не се потврдува со напишаното во текстот.
Фотографија: Написот е илустриран со две фотографии. На поголемата веројатно е прикажано местото на авионската несреќа (нема авторски потпис и легенда), а помалата е со ликот на Трајковски.
Говор на омраза: Експлицитното тврдење дека станува збор за „убиство“, без да се изнесат никакви аргументи и притоа да се в пери прстот во „конкретен извршител на убиството“, има елементи на говор на образа, бидејќи без докази обвинува за злосторство.
Заклучок: Порталот подметнал „бајата“ информација како новост, со што несомено ја злоупотребил довербата на читателите. Онака како што е пласирана „веста“ со крајно шпекулативен, дури опасен наслов, очигледно е дека намерата на медиумот била да фрапира, да го привлече вниманието на публиката со сензационализам и да ја наведе на погрешен заклучок. Што несомнено претставува демонстрација на дрскост и отсуството на одговорност кон јавноста.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
неофицијални
нерелевантни
1 извор
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
целосно невистинит
извртување на вистина (спин)
лажни информации
наклонетост
друга пристрасност
КОМЕНТИРАЊЕ
нема коментаторски елементи
ПЛАГИЈАТ
целосна копија
ненаведен автор
КВАЛИТЕТ НА НАСЛОВОТ
дезинформира
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови