Непристоен наслов со улични квалификации
Објавено во Рецензии
on 3 - 02 - 2016 Автор: Љубомир Костовски
[Рецензија: Катица дфинитивно има фазла во главата: Пред Советот на обвинители изјавила дека може што сака и кого сака да брка!]
Малку кој пред 10-15 години би верувал дека еден од основните проблеми на македонското новинарство ќе стане пристојноста. На ова, секако, помислуваме секој ден, откако некој се сети дека старовремското надвикување преку соседската ограда може да се замени со навредување преку написи, коментари, прилози…
На овој збор – пристојност, се потсетуваме и кога го читаме текстот што е предмет на оваа рецензија, поточно насловот кој како да е излезен од бапските кавги по сокаците. Не само што терминот „има фазла во главата“ е некако архаичен, па дури и неразбирлив за повеќето од консументите на вести од помладата генерација, туку е недозволив во јавната комуникација. Овојпат се користи во ставањето на некаква „круна“ на извештај од еден настан, кој е релативно коректно пренесен во самиот текст, можеби и преземен од некоја агенција или друг медиум, но тој требало да стане дел од една силна и оркестрирана кампања против специјалната јавна обвинителка.
Линк до оригиналниот напис: Катица дефинитивно има фазла во главата: Пред Советот на обвинители изјавила дека може што сака и кого сака да брка!
Датум и време на објавување: 01.0202016
Датум на рецензирање: 02.02.2016
Рецензент: Љубомир Костовски
НЕСПОРНА НАДЛЕЖНОСТ
„Комисијата утврдила дека има разрешување и отказ и дека Јанева има законска можност за намалување на бројот на обвинители, но законот не обезбедил второстепеност во вакви ситуации, каде оштетените сега можат да се жалат. „Јас сум таа што одлучува кој и како ќе работи во обвинителството и не би сакала да коментирам понатаму. Што има, ќе си каже Советот на обвинителите“, рече Јанева.“
Ова е само доказ дека настанот, кој беше насловен „сослушување на специјалната јавна обвинителка“, е коректно пренесен и со акцентирање на најважните детали.
По повод намалувањето на бројот на вработените во Советот за јавни обвинители, секако може да има и коментари и правни (и други ) анализи, ама е недозволиво, како прво, да се става наслов кој нема буквално никаква врска со содржината (текстот), а, како второ, уште полошо е кога во насловот се користи израз кој е надвор од споменатата пристојност. Да не зборуваме за жанровската неадекватност (коментатоски наслов на вест), но тоа е најмалиот проблем во случајов.
Да се послужиме во оваа пригода со дефинирањето што за овој термин го користи упатството на „Википедија“, што ни се чини разумно (види тука).
„Пристојноста е основното и најважното начело за поведение на „Википедија“. Неговата примена е задолжителна при уредувањето на статии, при пишувањето коментари на страниците за разговор, а исто така и при опишувањето на уредувањата. Неучтивоста може кратко да се опише како однесување кое придонесува за создавање атмосфера која создава конфликти и непочитување. Според принципите и упатствата на „Википедија“, сите корисници се должни во меѓусебните односи да бидат учтиви.“
Со оглед дека „Википедија“ има и расчленети примери на непристојност, овој наслов ја заслужува таа оцена барем по неколку – користење на грубост, недоличен опис, понижување на оној субјект кој е во веста… и да не наведуваме понатаму.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
2 извори
повеќестрани
СЕОПФАТНОСТ
сеопфатнo
нема прикриени информации
ПРИСТРАСНОСТ
целосно прикажува вистина
нема извртување на вистина (спин)
нема лажни информации
не аплиактивно
КОМЕНТИРАЊЕ
има коментаторски елементи
издвоено од фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор во насловот
Насловот поттикнува омраза кон функционерката од веста
Насловот може да поттикне насилство кон функционерката од веста
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови