[Рецензија: Прес на СЈО за нов случај „Специјален секс“ – ВИДЕО]

Оваа објава е исклучително вулгарна, надвор од сите новинарски стандарди, дури не спаѓа ниту во послободните критички новинарски жанрови. Материјалот се темели на видеозапис кој претставува шовинистичка пародија, која ги минува границите на пристојност и има цел да ги исмее јавните обвинителки.

Линк до оригиналниот напис: Прес на СЈО за нов случај „Специјален секс“ – ВИДЕО

Датум и време на објавување: 21.04. 2016, 15:45

Датум на рецензирање: 25.04.2016

Рецензент: Димитар Тануров

ПРИМИТИВИЗАМ И НЕВКУС

„СЈО излезе денес на нов прес да го презентира најновиот случај кој го отворија. И овој назив тотално одговара на делото – СПЕЦИЈАЛЕН СЕКС. Проследете го видеото од пресот на јавните обвинителки и дознајте колку, каков и дали имаат секс нашите 3јавни специјални обвинителки. Скандалозно овој случај се води против нив 3те што е голем апсурд. Што мислите која има најмногу секс?“

Медиумската содржина што ја рецензираме е пласирана во категоријата „вести“, што само по себе подразбира дека на читателите треба им се понуди сериозна информација. Но, во конкретниот случај тоа не е така. Уште со самиот наслов  се навестува дека  објавата нема да биде поврзана со прес-конференцијата на Специјалното јавно обвинителство. Ваквиот впечаток се потврдува со видеозаписот во кој се изнесени навредливи сексистички ставови, што е недозволиво според стандардите предвидени во  Кодексот на новинарите:

Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…). (Член 10)

Новинарот ќе се придржува и на општо прифатените општествени стандарди на пристојност и почитување на етничките, културните и религиозните различности во Македонија. (Член 11)

Начинот на кој е обработен и пласиран овој материјал се коси и со принципите искажани во Прирачникот за етика во новинарството  (стр.21 -22), каде е прецизно  наведено дека:

• Медиумот и новинарот не треба да објавуваат материјал (информација, слика, мислење, коментар) кој има цел да шири непријателство или омраза или ако постои голема веројатност дека објавениот материјал ќе предизвика непријателство или омраза спрема некого поради неговата раса, етничка припадност, пол, вера, политичка припадност, сексуална ориентација, физички недостаток итн.
• Новинарот мора да биде свесен за последиците и за ефектите од неговите зборови, мора да внимава на нивниот избор и не смее да навредува или да исмејува. Професионалниот новинар никогаш нема да зборува за личности врз основа на стереотипи и на предрасуди за расата, полот, возраста, религијата, етничката припадност, сексуалната ориентација, телесниот недостаток, физичкиот изглед или социјалниот статус.
• Јазикот на новинарите секогаш треба да биде одмерен и неутрален, наспроти оној што нуди готови заклучоци и судови и е, или се граничи со говорот на омраза. Секогаш треба да се избегнуваат фрази кои во себе носат шовинистички, сексистички или какви било други дискриминаторски конотации.

   

Дури и да е објавен во категоријата „забава“, според содржината текстот не е соодветен за објавување, особено зашто со него безобразно и невкусно се обидува да се дискредитираат обвинителките поради нивните персонални карактеристики.

Можеби, идејата на креаторите на ова дело била да се направи козерија, инспирирана од актуелниот настан (прес-конференцијата на Специјалното јавно обвинителство) и сè поголемата популарност на СЈО ( особено на трите обвинителки). Меѓутоа,  „проблесокот“ е така стокмен  што тој е далеку од забавен и хумористичен. И, иако е наведено дека видеозаписот е испратен од читател, сепак тоа не ја намалува одговорноста за објавената содржина која претставува олицетворение на примитивизам и на невкус.