[Рецензија: Дали ова е приватна јахта на Радмила Шеќеринска?]

Линк до оригиналниот напис: Дали ова е приватна јахта на Радмила Шеќеринска?

Датум и време на објавување: 16.08.2015, 12:47

Датум на рецензирање: 20.08.2015

Рецензент: Владо Ѓорчев

Веста не е вистинита. Тоа го потврди и заменик-претседателката на СДСМ, Радмила Шеќеринска на гостувањето во емисијата Топ тема на телевизија Телма. Таа рече:

Овие плукачи, оваа власт, со овие институции владее девет години. Дај боже да имам, ама не е така. Нешто да докажеа, нешто да најдеа, точка, запирка. Ме слушале десет години, нешто ќе дознаеја.

Првото правило, кое е и основа на новинарството, е веста да се провери. Тоа не е сторено. А, што требало да направи новинарот? Секако, да ѝ се јави на Шеќеринска и да ја праша: Дали оваа јахта е Ваша? Такво нешто нема во текстот.  Шеќеринска подоцна се огласи во јавноста и побара да се направи една дебатна емисија во која би се разговарало за тоа кој каде бил на одмор и колку пари потрошил. Во овој медиум овој одговор од неа не беше објавен во ниту еден текст потоа.

Луксузот е познат за Шеќеринска. Таа со својот сопруг и неговата фамилија, имаат неколку станови во Скопје и Охрид, имаат вила во Маврово, возат скапи возила и џипови, не штедат на имиџ и облека. Овие слики од одморот само ја оформуваат сликата за тоа како живее едно семејство во убав и луксузен живот. Тоа не е проблем, но е проблем што станува збор за политичар кој многу од тоа сака да скрие од очите на јавноста.

Тенденцијата на овој пасус е да се омаловажи Шеќеринска и таа во лошо светло да се претстави во јавноста. Тоа го има во сите текстови во провладините медиуми кои се дел од хајката против неа.

Од новинарски аспект спорно е тоа што не е контактиран ниту еден извор за да се поткрепи вистинитоста.

Несодржајноста оди дотаму што не се наведува ниту од кога е јахтата, како ја купила, каде ја чува…? Поради тоа излегува дека целата приказна е непотврдена, со неосновани информации. Но, кому му е гајле за неоснованоста кога хајката против Шеќеринска се води извесно време.

Кога еден текст ќе потврди ваква информација нормално е да се очекуваат докази и факти за ваквата теза. Кои се фактите со кои авторот го поткрепува ваквото свое тврдење?

Исто така, спорно е што не е наведен изворот на фотографиите и како е дојдено до нив. Објаснувањето е фотографиите кои ги добивме. Дали им ги испратил некој читател, турист, била следена или новинарот се потрефил на исто место со неа?

Дали е сосема случајно што името на јахтата е исто како името на ќерката на Шеќеринска ќе треба таа да даде одговор, но за нас е сосема доволно за да поставиме прашање до неа. На следната слика покрај името на јахата се гледа дека таа плови под грчко знаме, што значи дека како сопственост е регистрирана во Грција.

И на овој пасус не може да му се потврди веродостојноста. Тука се шпекулира дека станува збор за името на ќерката на Шекеринска. Сепак, ако се провери, ќе се дојде до податок дека АДА е и скратеница од име на компанија што произведува јахти. Дали можеби станува збор за име на компанија? Секако дека е можно, а ова како дилема требало да се наведе и во текстот.

Затоа може да се заклучи дека текстот е неверодостоен, необјективен и несодржаен. Во него морало да се постави и дилема дека можеби не е така. Не може само голо да се пласира шпекулација која не е проверена.

Ова е уште еден текст кој има цел да омаловажува. Тој е дел од хајка која сè уште трае и мора да се каже дека е надвор од новинарските стандарди.