Морбидна трка за пребројување на жртвите
Објавено во Рецензии
on 9 - 08 - 2016 Автор: Југослава Дуковска
[Рецензија: Бројот на жртвите во Стајковци и околината се искачи над 50]
Куса вест која заслужува и куса рецензија: веста е невистинита, непроверена и дезинформира, а ги нема ниту основните елементи што се неопходни за една вест.
Линк до оригиналниот напис: Бројот на жртвите во Стајковци и околината се искачи над 50
Датум и време на објавување: 7.08.2016
Датум на рецензирање: 8.08.2016
Рецензент: Југослава Дуковска
ДЕЗИНФОРМАЦИЈА
„Според информациите од терен кои ги добиваме дознаваме дека бројката на жртвите значително расти. Во овој момент бројката на жртвите погинати од невремето во Скопје и регионот изнесува околу 50“.
Пред сè, веста е неточна. Официјалните информации веќе во времето на објавување на оваа вест беа дека има околу 20 жртви на поплавите од 6 август. Не може да се потврди веродостојоста на наводите, а и самата вест се повикува на неидентификувани „информации од терен“, кои не се релевантен извор. Но, иако првата реченица содржи ограда дека тврдењето дека „расте бројот на жртвите“ се базира врз информациите од терен, во втората реченица категорички и без ограда се тврди:
„Во овој момент бројката на жртвите…изнесува околу 50“.
Ниту „веројатно“ ниту „се стравува дека“, туку „изнесува“, што е дезинформација. Истата дезинформација фигурира и во насловот, кој е сензационалистички и бомбастичен, а во основа и неточен.
Освен тоа, без оглед што се работи за вест која треба да информира за вонредна состојба, за кризна ситуација која е во тек и во која состојбите и податоците сè уште не се конечни, без оглед на брзањето да се објават понови и посвежи податоци за големата поплава што го зафати Скопје, веста не можеше и не смееше да биде објавена без одговорите на сите пет новинарски прашања: кој, кога, каде, како и зошто. Кога било невремето во оваа вест не е наведено (вчера, вечерва, минатата недела, лани…), па во некое идно пребарување на архивата на вести оваа вест ќе го остави читателот збунет.
Брзоплетоста да се објави сензација во овој случај дејствувала морбидно, бидејќи изгледа како некој да се натпреварува со другите медиуми кој повеќе жртви на невремето во Скопје ќе преброи и ќе објави.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
анонимни
нерелевантни
не може да се утврди
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
невистина
извртување на вистина (спин)
лажни информации
друга пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
нема мултимедијални елементи
нема контекстуални линкови
делумно стилски уреден
неповрзан со тагови