[Рецензија: ГОЛИ ОТОК ЗА ГЛАСАЧИТЕ НА ВМРО-ДПМНЕ: Љуми Бекири, Ацо Кабранов, Синоличка Трпкова и Јон Фрчкоски бараат затвор за 455.000 Македонци кои се против Сорос!]

Мегаспин! Нема друг термин за ова чудо од напис коj најдобро покажува како во Македонија може да се манипулира и да се изврти безмалку секој јавен или личен настап. Еден, единствен фејсбук-статус на млад човек, активист, познат по своите изјави против актуелната власт, е злоупотребен не само за да се даде поинаква конотација, туку и да се залепи шмек на генерализација – дека една група луѓе е против гласачите на владејачката партија?!

 Линк до оригиналниот напис: ГОЛИ ОТОК ЗА ГЛАСАЧИТЕ НА ВМРО-ДПМНЕ: Љуми Бекири, Ацо Кабранов, Синоличка Трпкова и Јон Фрчкоски бараат затвор за 455.000 Македонци кои се против Сорос!

 Датум и време на објавување: 22.01.2017

 Датум на рецензирање: 24.01.2017

 Рецензент: Владимир Мирчески

МАНИПУЛАЦИЈА, НАВРЕДИ КЛЕВЕТИ

Од една објава на „Фејсбук“ до целосен спин со високи дози невистина. Читајќи го овој пропаганден памфлет, јасно се гледа дека намерата е да се настрви на одредени личности кои власта многу не ги „мириса“. Притоа, не се гледа на средствата за да се исполни целта. Користено е сè и сешто. Од манипулација, генерализација, навреди и клевети, бележење и стигматизирање, до употреба на несоодветни фотографии.

Значи, Љуми Бекири напишал: „Кој не сака отоворено општество, затворено има во Идризово“ и топката почнала да се тркала.

„Соросовите платеници скандалозно најавуваат затвор и прогон за сите неистомисленици со политиките на милијардерот Џорџ Сорос во Македонија“.

Прво, од каде тоа дека ФБ-коментарот на активистот е насочен токму против граѓаните, и тоа сите, ама баш сите кои на последните избори гласале за коалицијата на десетици партии предводена од ВМРО-ДПМНЕ. Саркастичниот коментар можеби е само за врвот на партијата, зашто ако нејзиното раководство е контра Сорос, тоа по автоматизам не подразбира дека сите што го дале гласот за таа коалиција го делат истиот став за Фондацијата „Отворено општество“ како Груевски и неговите соработници. Каква е оваа непримерна генерализација која се потира на шпекулација, а не на факти?

Доколку информацијата не може да се потврди или станува збор за претпоставка, односно шпекулација, тоа треба да се каже и да се објави, вели член 1 од Кодексот на новинари.

Како тоа да не било доволно, па се забегало и во именување црни места од историјата, како некакво сценарио за кое, наводно, се залагала личноста што го објавила коментарот.

А КОЈ ГО СПОМНАЛ „ГОЛИ ОТОК“?

Какво „сечење, лепење и монтирање“. Кој тоа го споменал „Голи Оток“, познат како место за елиминација на политички неистомисленици и тоа управуван од тогашната власт?! Значи, „Голи Оток“ како синоним за пресметка со оние кои поинаку мислат подразбира дека тоа би било можна алатка на тој што е на власт!

Бидејќи постот добил „лајкови“, меѓу другото, и од неколку новинари и јавни личности кои не се во „мегафонската лепеза“, тоа некому добро му дошло како оправдување дека и тие се за наводното затворање на сите гласачи на ВМРО-ДПМНЕ.

„Љуми Бекири, Ацо Кабранов, Синоличка Трпкова и Јон Фрчкоски бараат затвор за 455.000 Македонци кои се против Сорос“.

Тврдење кое зад себе нема аргументи.

И конечно, овој нагласено тенденциозен мегамикс е финиширан со визуелизација во форма на несоодветни фотографии. Страшно, извлечено е сè што може да се ископа на „google images“ и ставено е во служба на манипулацијата. Своевидна параноја пласирана како медиумски производ.