[Рецензија: Бетмен пушит активиран од режимот да ги јаде лајната кои ни Филип Петровски не сака да ги изеде, се заканува ќе тепал се од Шарената револуција]

Освен „километарски“ долг наслов кој всушност, сакал, да каже сѐ, ова што треба да биде напис нема никаков текст, само скриншот од фејсбук-објава! Станува збор за еден од многуте примери низ интернет-порталите во кои се уриваат сите стандарди на новинарско пишување, бидејќи овде најмалку има новинарство, а уште помалку има пишување. Се работи за класична злоупотреба на медиум во кој, поради статус на „Фејсбук“ на неистомисленик, се употребува највулгарен речник за негова дискредитација. Недолични зборови и за усна комуникација, а камоли ставени во пишана форма и кои, впрочем, читателската публика нема апсолутно никаква потреба да ги консумира.

Линк до оригиналниот напис: Бетмен пушит активиран од режимот да ги јаде лајната кои ни Филип Петровски не сака да ги изеде, се заканува ќе тепал се од Шарената револуција

Датум и време на објавување: 06.06.2016

Датум на рецензија: 08.06.2016

Рецензент: Силвана Жежова

Насловот, кој воедно е и целиот текст, е долга навреда за Богдан Илиевски, алиас Бетмен велит, кој во статус на „Фејсбук“ го изразува својот став по повод барањата на „Шарената револуција“ и датумот до кој демонстрантите очекуваат тие да бидат исполнети. Но, несогласувањето со нечиј став не дава право да се употребува навредлив и недоличен говор.

Овој „напис“ е еклатантен пример за кршење на упатствата и на препораките од членот 11 од Кодексот на новинари, предадени во Прирачникот за етика во новинарството (стр. 22), во кои се вели дека „Јазикот на новинарите секогаш треба да биде одмерен и неутрален, наспроти оној што нуди готови заклучоци и судови и е или се граничи со говорот на омраза. Секогаш треба да се избегнуваат фрази кои во себе носат шовинистички, сексистички или какви било други дискриминаторски конотации“.

НЕДОЛИЧНА ИНОВАЦИЈА

„Бетмен пушит активиран од режимот да ги јаде лајната кои ни Филип Петровски не сака да ги изеде, се заканува ќе тепал се од Шарената револуција“

Во материјалот што е предмет на рецензија се воведува некоја нова, непозната и несоодветна форма на комуникација со читателската публика, во која наместо текст се ставаат принтскинови од статус на „Фејсбук“ и текст по чијшто повод е напишан тој статус. Постојат новинарски правила на пишување како истото може да се каже и низ текст… Но, повторно, соочени со содржината, се прашуваме која е потребата од пласирање вакви „работи“ и кој е општиот јавен интерес за негово пишување.

Според членот 5 од Кодексот на новинари, предадени во Прирачникот за етика во новинарството (стр. 19):

Јавниот интерес вклучува информации кои можат да придонесат за откривање на: криминално дело, злоупотреба на положба од страна на носител на јавна функција, загрозување на демократијата, корумпираност, случаи на неправда, кршење на човекови права, дискриминација, загрозување на здравјето и безбедноста на луѓето, немарност и/или неспособност на јавните функционери. Јавниот интерес, исто така, вклучува информации кои им помагаат на луѓето да донесат одлуки од јавен карактер и го спречуваат заведувањето и манипулацијата со населението со изјави или постапки на поединци или организации.

Бидејќи материјалот што е предмет на рецензија нема текст, тој не го задоволува минималното ниво на содржајност и на сеопфатност. Се употребува навредлив и говор за дискредитација на личност со која се нема ист став.