[Рецензија: Катица Јанева чека по телефон некој да ѝ ги испрати одговорите на прашањата од пратениците!]

Ова е уште еден текст од серијата напади на специјалната јавна обвинителка, Катица Јанева. Таа е под постојана „тортура“ од медиумите наклонети на владејачката партија, кои без грам професионалност штанцаат текстови за да ја дискредитираат. Таков е и овој текст.

Линк на оригиналниот напис: Катица Јанева чека по телефон некој да ѝ ги испрати одговорите на прашањата од пратениците!

Датум и време на објавување: 22 Септември 2016, 14:12

Датум на рецензирање: 23.09.2016

Рецензент: Владо Ѓорчев

ПО СЕКОЈА ЦЕНА ДА СЕ ОЦРНИ ЈАНЕВА

„СЈО и Јанева покажа незнаење за тоа што е демократија и политички систем. Не знаете што е по Устав и дефиниција народен пратеник. Успеавте еден од  најискусните пратеници овде, г-ѓата Роза Топузова да ја изнавредите со тоа што и рековте дека зад неа не стојат гласачи. Зад вас кој стои, г-ѓо Катица Јанева? Пуштете телевизор, ако знаете англиски, бидејќи се залагате за двојазичност и гледајте BBC да видите како изгледа англиски парламент и да видите дека таму има цел блок на независни пратеници. Но изгледа терминот независен пратеник воопшто не ви е познат. Тоа се учи во училиште, а не во турбофолк средина, рече Солза Грчева.“

Oд настапите на пратеници во Комисијата за политички систем и односи меѓу заедниците, конструирана  е невистина. Не е вистина дека специјалната јавна обвинителка некогаш и некаде се залагала за двојазичност. Такви записи нема. Инаку, ова наликува на нападите на лидерот на СДСМ, Зоран Заев, за наводно залагање за двојазичност што, исто така, е спин, а „Сервис за проверка на факти во медиумите“ правеше и рецензија. Тоа што оваа теза потоа се пренесува на Јанева е недозволиво и тоа што барем најмалку требало да се направи е написот да се огради од ваквите невистини искажани на комисиската расправа. Сепак, такво нешто во текстот нема.

На специјалната јавна обвинителка, исто така, ѝ се забележува зошто не ставила слушалки кога зборувал пратеник Албанец, па текстот прашува дали обвинителката знае албански?! А зошто би се проблематизирало тоа дали некој знае албански јазик? Јазиците се богатство и треба да бидат гордост, а не место за мегдан.

САМО ЕДНА СТРАНА

Тезата пласирана во насловот, пак, е извадена од говор на една пратеничка:

„Видовме вчера дека не сте способна на ниедно прашање веднаш да одговорите. Чекавте по телефон некој да ви ги испрати одговорите, а суфлерите позади вас веќе беа снимени од камерите. Вие кога зборуваше Рафиз Алити не ги имавте ставено ни слушалките. Дали можеби разбирате албански? Како потоа му одговоривте? – истакна Грчева.“

Нејзиниот исказ се зема како неприкосновена вистина и се пласира во насловната конструкција, без да се посочи дека тоа е став на една пратеничка.

Сосема е во ред еден новинарски напис да пренесе изјава од пратеник, но сепак, тоа не може да биде земено како единствен факт и на него да се темели целиот текст. Професионалниот пристап подразбира да се провери кажаното и на некој начин да се докаже изнесеното тврдење, за да може јавноста да се увери дека тоа е навистина така. Меѓутоа, ваква проверка нема во написот, кој фактички безрезервно верува во тоа што го говори пратеник критички настроен кон Специјалното јавно обвинителство. Текстот нема ниту изјава од Јанева, а и пратеничката не е дополнително прашана за да појасни од каде  ѝ се нејзе таквите информации.

Очигледно е дека во написот намерно се пренесени само делови од дикусиите на двете пратенички од Комисијата за политички систем и односи меѓу заедници (иако во Комисијата има повеќе членови), за да се направи спинерска конструкција во која ќе се оцрни специјалната јавна обвинителка.