[Рецензија:Нови економски штети по државата од кризата предизвикана од Заев]

Опозицијата е виновна за губење на европските пари, а владејачката партија сега се труди да направи нешто во врска со таа одлука на Европската комисија. Вака накратко може да се резимира оваа спинувана еднострана објава, со јасни елементи на политичка пристрасност.

Линк до оригиналниот напис: Нови економски штети по државата од кризата предизвикана од Заев

Датум и време на објавување: 02.07.2016, 15:43

Датум на рецензирање: 05.07.2016

Рецензент: Александар Пешев

Воведниот дел на текстот е изведен професионално, со пренесување на целосното образложение на Европската комисија за кратење на дел од претпристапната помош за земјава. На читателот му се дава точна слика околу одлуката на Брисел, за потоа истата да се изврти со редица коментари.

„Со ова на Македонија и е нанесена економска штета, предизвикана од политичката криза во која СДСМ ја втурна нашата земја“.

Нема атрибуција, ниту е наведен изворот на ваквото тврдење. Овој коментар, интегриран во текстот, е почетна точка за изведување на спинот. На него се додава општ преглед на правилата за употреба на ИПА 2. Наместо да се насочат серија прашања кон надлежните институции (на пример, Секретаријатот за европски прашања), се редат дополнителни коментари, поточно обвинувања на адреса на опозицијата.

„Изминатиов период опозицијата на чело со Зоран Заев предизвика криза во Македонија која ја чувствуваат и економијата и граѓаните“.

Евидентна е едностраноста во текстот, имајќи предвид дека власта е видно заштитена и покрај сосема прецизните објаснувања од Европската комисија, а се напаѓа само опозицијата, што укажува на политичка пристрасност.

И коментари наменети за спинување на првично презентираниот факт се во насока на амнестирање на институциите, кај кои би можело да се најде дополнителна вина, а не само неспроведувањето на реформите и немањето политичка волја за тоа.

„Дополнително, со оглед на тоа дека во изминатиот период Македонија беше предводена од техничка влада со мандат претежно ограничен на подготовка за спроведување избори, дел од мерките во секторот Управување со јавни финансии не можеше да се реализираат, што доведе до губење на дел од средствата за 2016 година“.

Едностраната аргументација, всушност, гласи дека опозицијата е виновна за губењето на европски пари, додека институциите кои требале да помогнат не успеале поради постоењето на техничка влада. Ваквиот пристап во известувањето е тема и на анализа на сервисот „Вистиномер.мк“, а заклучокот на анализата е следниов:

„Ако некој отвоено вели дека Владата е без политичка волја, Владата нема подготвеност, нема зрелост, нема политичка посветеност, итн., и поради тоа се кратат 27 милиони евра, а помошта нема да биде продолжена со друг проект, спинување е да се крие дека тоа не биле санкции или казна од ЕУ за Македонија во целост, а уште поголемо извртување на вистината е за таквата одлука да ја обвините опозицијата“.

Политичката пристрасност на објавата пред нас станува евидентна, имајќи ги предвид навивачките елементи кои следуваат во продолжение. По нагласувањето дека опозицијата придонела за кратење на европските пари, се редат најави за активности: подготовка на стратегија за управување со јавни финансии, јакнење на административни капацитети во Секретаријатот за европски прашања и сл. Клучното прашање кое не се одговара е следново: колкава е одговорноста на овие институции за веќе предизвиканата штета, поточно за губење на парите наменети за европеизација на земјава? Но, наместо критички пристап, имаме своевиден обид за амнестија на овие институции, со што се комплетира спинот – опозицијата е виновна, а владејачката партија ќе се труди да направи нешто.

По прегледот на најавени активности, кој остава впчаток на промоција на институциите во чија работа веќе не е вклучена опозицијата, текстот заклучува со конечниот коментар:

„Опозицијата во Македонија конечно треба да се однесува како одговорен партнер за да се реши кризата наметната токму од нивна страна“.

Како да се целело да се доутврди впечатокот што се сака да му се наметне на читателот уште со првиот коментар. Сè на сè, имаме целосно непрофесионална вест, со извртен наслов и измешана со коментари, плус насочени кон дискредитација на една политичка партија и на нејзиниот лидер, кој се посочува директно со фотографијата, а во исто време се прави индиректен маркетинг на друга партија. И сето тоа со пристрасност, која јасно може да се идентификува како политичка.

Оттука, бројни се прекршувањата на професионалните правила и на етичките норми во новинарството во овој текст, кој може да се посочи како пример како не треба да се практикува новинарството.