[Рецензија: Груевски во Шипковица – го дочекаа со благодарница]

Претседателот на ВМРО-ДПМНЕ, Никола Груевски, на средби со граѓаните им ветува дека преку институциите ќе им ги реши проблемите, со што фактички грубо се нарушува принципот на одвоеност на партијата од  државата. Промовирајќи ги споменатите активности на Груевски, пак, текстот што го рецензираме активно учествува во промоцијата на ваквата политика  Тоа е спротивно и на домашниот и на меѓународните кодекси на новинарите (но и на сугестиите на меѓународната заедница), каде  јасно се укажува дека:

Известувањето од политичките процеси, особено од изборите треба да биде непристрасно и избалансирано. Новинарот мора да обезбеди професионална дистанца од политичките субјекти.

Линк до оригиналниот напис: Груевски во Шипковица – го дочекаа со благодарница

Датум и време на објавување: 01.08.2016, 20:38

Датум на рецензирање: 02.08.2016

Рецензент: Александар Писарев

ДА СЕ ЗНАЕ КОЈ ГИ ДРЖИ КОНЦИТЕ

Рецензираме уште еден документарец  во режија на ВМРО-ДПМНЕ, кој ги величи ликот и делото на лидерот на партијата  и го прикажува како личност која во државата ги држи сите конци во свои раце. Иако во овој миг е само лидер на политичка партија (нема државна функција), пред жителите на Шипковица е прикажан како промотор на нови владини проекти што треба да ги спроведе државата, ветува дека ќе ги реши нивните проблеми, ќе обезбеди пари за нови инвестиции, инфраструктура…  Груевски е во придружба на владини функционери и на претставници на државни јавни претпријатија, кои детално му реферират за она што сработиле и му ветуваат што ќе направат во наредниот период.

„Груевски најави дека ќе се реализираат и дел од инфраструктурните проекти, кои се на барање на мештаните, како што е изградбата на неколку локални патишта во регионот околу Шипковица. Груевски рече дека ќе се заложи комисијата за проценка на штетите да биде повторно испратена во селото“.

„За селаните  е најважно поплавите никогаш да не се повторат, изготвен е проект за санација на карпата, потокот, и каналот од страна на УНДП и Министерствот за екологија и у најскоро време почнува реализацијата. Станува збор и за патот од Шипковица према Бродец… Јавното претпријатие за државни патишта направи три километри тука нашата обврска како централна власт заврши… –  реферираше државниот секретар од министерството за финансии“.

„ЗАСТАВА ФИЛМ“ ПРИКАЖУВА

Текстот и видеоинсертите се концепциски направени како предизборен спот кој го прикажува амбиентот на задоволство, сигурност и целосна безгржност на граѓаните, кога го слушаат и гледаат Груевски како издава наредби, упатства и со голема сериозност прима рапорт од државните функционери, иако тој лично нема никаква функција во државата. Во видеоинсертите граѓаните на Шипковица се прикажани како неизмерно благодарни и среќни од политиката на Груевски, кој пак, е претставен како личност омилена во сите етнички средини.
Текстот, фотографиите и филмските инсерти содржински немат новинарска тежина и не носат вест или информација од јавен интерес. Овој непотпишан фалбаџиски напис е срочен и комбиниран со видеоинсерти во стилот на „филмске новости“ од раните шеесетти години на минатиот век, кои се прикажувале како журнал пред почетокот на филмот во сите кина на поранешната СФРЈ и имале функција да ги величат успесите на комунистичката партија и на нејзиниот водач.