[Рецензија: ЕКСКЛУЗИВНО: ВМРО-ДПМНЕ СПРЕМА НЕМИРИ ЗА НОЌНИТЕ ЧАСОВИ ДО 11-ТИ ДЕКЕМРИ]

Текст кој во клучен и кревок период пред изборите закажани за 11 декември, тенденциозно подгрева насилна атмосфера и тензии преку ширење шпекулации кои ги претставува како ексклузивна информација.

Во написот се тврди дека ВМРО-ДПМНЕ, наводно,  подготвува насилно сценарио откако ќе загуби на изборите на 11 декември. Според напишаното, целта на ова сценарио, кое вклучува крв и немири, ни помалку ни повеќе била бегство на раководството на ВМРО-ДПМНЕ.

Линк до оригиналниот напис: ЕКСКЛУЗИВНО: ВМРО-ДПМНЕ СПРЕМА НЕМИРИ ЗА НОЌНИТЕ ЧАСОВИ ДО 11-ТИ ДЕКЕМРИ

Датум и време на објавување: 30.11.2016

Датум на рецензирање: 04.12.2016

Рецензент: Симона Атанасова

ШПЕКУЛАЦИИ

„Во ВМРО-ДПМНЕ се спрема сценарио за уфрлање на радикално насилни структури кои треба да предизвикаат немири и крв поради сознанијата за нивниот катастрофален пораз на изборите на 11-ти декември, ексклузивно дознава Centarnews од извори на раководството на владеачката партија. Позната криминална групација предводена од лица со дебело криминално досие со наредба од ВМРО-ДПМНЕ имаат задача да прават хаос во државата, посебно во ноќните часови, се со цел врвот на ВМРО-ДПМНЕ да се обиде да ја напушти државата“.

Под превезот на фразата „дознаваме“, текстот ги манипулира читателите подметнувајќи им целосни шпекулации како точна и проверена информација.

За сето тоа што го тврди, текстот нема апсолутно никаква потврда од ниедна засегната страна. Ваквите силни констатации со остра и заплашувачка порака, за да остават впечаток на доверба кај јавноста, мораат да бидат поткрепени со некоја пореална и очигледна потврда, со нешто многу повеќе од „дознаваме“. Текстот е посиромашен и за официјална изјава и за став од ВМРО-ДПМНЕ.

Чиста претпоставка е и тврдењето дека ВМРО-ДПМНЕ ќе изгуби на изборите следната недела. Не е објаснето како е дојдено до тој заклучок, дали преку резулатите од анкетите објавени во последен период или, пак, станува збор за нешто друго. Вака како што е напишано личи на „пуста желба“.

Текстот завршува со неколку тенденциозни прашања скроени во коментаторски манир. Се споменуваат отказни решенија, контрапротест, носење гласови… И под претпоставка дека ова е вистина, на читателот мора да му се прикажат примери кога тоа се случило, за тој самиот да се увери  дека напишаното е точно. Вака како што е пласирано, изгледа како да е само нафрлено, па  и измислено.

Почитувањето на принципите пропишани во Кодексот на новинарите треба да биде основа на секој новинарски текст. Тоа, за жал, не е случај со овој напис во кој се прекршени повеќе членови од Кодексот, меѓу кои:

Новинарот треба да објавува точни, проверени информации и нема да прикрива суштински податоци и да фалсификува документи.
Доколку информацијата не може да се потврди или станува збор за претпоставка, односно шпекулација, тоа треба да се каже и да се објави. (1)

Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…). (10)

Новинарот треба да прави разлика меѓу фактите и мислењата, меѓу веста и коментарот. (13)

 Известувањето од политичките процеси, особено од изборите треба да биде непристрасно и избалансирано.
Новинарот мора да обезбеди професионална дистанца од политичките субјекти. (14)