[Рецензии: НОВО ВИДЕО ОД ИСВИРКУВАЊЕТО НА ЗАЕВ: „Да ти е**м жената“, „П**ер“, „Гнида“, „Кодош“ и уште многу сочни пцовки!]

Исвиркување, еве, да кажеме и дека било спонтано, искористено како рекламен материјал за власта. Докажување, преку текст кој треба, а кој не треба да се појави на Мечкин камен на Илинден, зачинето со коментари и пристап на исклучивост. Врв на сè е употребата – пренесувањето на „сочни пцовки“ од присутните. Кога сè ќе се собере и извага, излегува дека станува збор за медиумски прозивод кој сериозно излегува од рамките на прифатливото.

 Линк до оригиналниот напис: НОВО ВИДЕО ОД ИСВИРКУВАЊЕТО НА ЗАЕВ: „Да ти е**м жената“, „П**ер“, „Гнида“, „Кодош“ и уште многу сочни пцовки!

 Датум и време на објавување: 04.08.2016

Датум на рецензирање: 04.08.2016

 Рецензент: Владимир Мирчески

„ОМРАЗЕНИОТ“ ОПОЗИЦИОНЕР

Четиво за задоволување на политичките страсти на партиското членство. Наводното „спонтано“ изразување незадоволство поради доаѓањето на лидерот на опозицијата во Крушево, искористено е за напис во кој, меѓу другото, се критикува неговото присуство на Мечкин камен. Демек, тој како да е недостоен за илинденско чествување:

„Пред два дена претседателот на СДСМ, кој покажа невидено лицемерие појавувајќи се во Крушево на Мечкин Камен каде што животот го положиле знајни и незнајни херои, борејќи се против тиранијата и кодошлакот, беше исвиркан од насобраните граѓани кои му порачаа дека неговото место не е меѓу патриотите“

Врз основа на што се обвинува и се носи пресуда за нечие лицемерство? Со кои новинарски алатки е проверено и аргументирано тврдењето? Со никакви. Сè е потпрепено на видеоматеријалот на кој  се слуша и се гледа исвиркување, ама кој ќе докаже дека тоа не се партиски активисти, провокатори, луѓе со задача, а не обични граѓани кои на тој начин го искажуваат револтот од работењето на опозицијата и го доведуваат под знак прашалник присуството на Заев во Крушево. Плус, имало инцидент и на другата страна во кој бил засегнат Никола Груевски, ама тоа не се споменува зашто текстот сака да го постигне ефектот на „сакан властодржец и омразен опозиционер“.

Искрено, не е првпат, а веројатно ниту последен партиски делегации да бидат исвиркани на Мечкин камен. Едноставно, можеби е тоа само рефлексија на нивото на политички култура кај партиите, кое не може да биде показател за општото расположение на населението за одреден човек, независно дали е на власт или во опозиција.

НЕДОЛИЧЕН ГОВОР

Настрана политичко-партискиот момент во написот на кој не се успеало да му се одговори непристрасно, објективно, без да се застрани, во случајов десно, проблематичен е и користениот говор. Во ред, станува збор за пренесување туѓи пцовки, ама сепак и во тоа треба да се има усул. Но, овде праг нема, пречекорени се нормите на прифатливото, би рекле дека изгледа како со извесен мерак да се редени зборовите на наводно самоиницијатвните викачи.

„Да ти е**м жената“, „П**ер“, „Гнида“, „Кодош“ и уште многу сочни пцовки!“

Што е многу, многу е…

Член 11 од Кодексот на новинарите е дециден:

Новинарот ќе се придржува и на општоприфатените општествени стандарди на пристојност и на почитување на етничките, културните и религиозните различности во Македонија.

Но, главниот проблем е што, според приложеното, воопшто и не се имале на ум професионалните стандарди при зачнувањето и оформувањето на текстот. Целта како да била само да се засили немилиот настан, за кој докрај не знаеме дали е спонтан или инстуриран чин од партиска кујна.

Значи, извори дискутабилни, пристрасност сериозна, професионалност никаква… Конечна оценка: лошо, навистина лошо.