Напис: ВИДЕО: Ахмети го придружуваа децата на паднатите борци на ОНА

Куманово, 4 декември – Лидерот на ДУИ, Али Ахмети, во саботата имаше огромен дочек од кумановските Aлбанци и од околината. Со ова паднаа во вода сите континуирани манипулации и шпекулации од неколку несериозни портали и медиуми, кои готват по антиалбанските кујни и повраќаат отров против симболот на албанската стабилност во Македонија, известува „Журнал“.

Среде Куманово, лидерот Ахмети цело време беше придружуван од децата на паднатите борци на ОНА, кои сега се школуваат на мајчин јазик, се вработуваат и како и целата албанска младина во Македонија, ги користат плодовите на ослободителната војна во 2001 година. Не случајно, и листата на кандидатите за пратеници во втората единица, каде што се Куманово, Липково, Арачиново, Чаир и др., е предводена од еден од борците од првите часови на ОНА, Ејуп Алими, додека на листата се наоѓа и синот на националниот херој Абаз Беќири, младиот Фуат Беќири, кој изјавил дека аманетот на неговиот татко полека се реализира.

Ахмети од Куманово ја пренесе пораката за обединување на сите Aлбанци во нивната национална кауза, бидејќи ДУИ ќе биде клучната политичка сила, која по 11 декември ќе ги одредува насоките кон кои ќе оди Македонија.

[Рецензија : ВИДЕО: Ахмети го придружуваа децата на паднатите борци на ОНА]

Како што нагласивме и во рецензијата за злоупотребата на децата во предизборна кампања од страна на движењето Беса, текст објавен од порталот „Тетова сот“, ќе дадеме и друг пример за злупотреба на децата за време на кампањата, но кој авторот не го видел како нешто многу штетно. Два случаи, речиси исти, но различни пристапи. Сосема различни.

Линк до оригиналниот напис: ВИДЕО: Ахмети го придружуваа децата на паднатите борци на ОНА

Датум и време на објавување: 03.12.2016

Датум на рецензирање: 05.12.2016

Рецензент: Ферикан Илјази

Во овој текст се претставува како гордост, добар гест и успех да се донесат децата на паднатите борци на партиски собир, иако ова е забрането со закони и со меѓународни конвенции за заштита на децата.

„Лидерот на ДУИ, Али Ахмети, во саботата имаше огромен дочек од кумановските Aлбанци и од околината. Со ова паднаа во вода сите континуирани манипулации и шпекулации од неколку несериозни портали и медиуми, кои готват по антиалбанските кујни и повраќаат отров против симболот на албанската стабилност во Македонија, известува ’Журнал’“.

Aко авторот си дозволува себеси своите колеги да ги нарекува несериозни, тогаш каде е сериозноста на тој што една политичка партија ја нарекува „симбол на стабилноста на албанскиот народ“ или што дава субјективни заклучоци и го возвишува пречекот на оваа партија во Куманово? Дали е новинар или партиски мегафон?

„Среде Куманово, лидерот Ахмети цело време беше придружуван од децата на паднатите борци на ОНА, кои сега се школуваат на мајчин јазик, се вработуваат и како и целата албанска младина во Македонија, ги користат плодовите на ослободителната војна во 2001 година. Не случајно, и листата на кандидатите за пратеници во втората единица, каде што се Куманово, Липково, Арачиново, Чаир и др., е предводена од еден од борците од првите часови на ОНА, Ејуп Алими, додека во листата се наоѓа и синот на националниот херој Абаз Беќири, младиот Фуат Беќири, кој изјавил дека аманетот на неговиот татко полека се реализира“.

 

Овие текстови полни со пофалби предизвикуваат морници. И да е партиско соопштение, не прилега овој стил, а уште помалку кога излегува како производ на една редакција за информативни цели.

Еве го и следниот бисер. Ахмети и ДУИ биле единствената сила, клучните што ќе одредат во која насока ќе оди Македонија. Како ќе се аргументира ова?

„Ахмети од Куманово ја пренесе пораката за обединување на сите Албанци во нивната национална кауза, бидејќи ДУИ ќе биде клучната политичка сила, која по 11 декември ќе ги одредува насоките кон кои  ќе оди Македонија“.

И тој што има основни знаења за политиката, може да разликува блеф, желби и реалност. Кодексот за етика на новинарите има прецизни одредби за ваков тип известувања:

• Новинарот треба да прави разлика меѓу фактите и мислењата, меѓу веста и коментарот.
• Известувањето од политичките процеси, особено од изборите, треба да биде непристрасно и избалансирано. Новинарот мора да обезбеди професионална дистанца од политичките субјекти.