Убава репортажа за Македонците на Малта
Објавено во Рецензии
on 11 - 11 - 2016 Автор: Силвана Жежова[Рецензија: Во Буџиба може и кафе да се нарача на македонски]
Текстот што е предмет на рецензија дава интересен приказ за животот на Македонците што работат во Малта. Во него се користат бројки, релевантни извори, изјави од луѓето што работат таму, така што тврдењата во него се поткрепени со факти. Освен светлата страна, текстот ги прикажува и проблемите со кои се соочуваат Македонците за добивање работна дозвола. Приказната е раскажана убаво и збогатена со соодветни податоци, а резултатот е информативен новинарски текст кој лесно се чита и е доста приемчив за пошироката публика. Истовремено, фрла светло врз реалниот проблем што Македонија го има, а тоа е иселување на младото работоспособно население, на кое Малта му е една од дестинациите во потрагата по подобар живот.
Линк до оригиналниот наслов: Во Буџиба може и кафе да се нарача на македонски
Датум и време на објавување: 17.10.2016
Датум на рецензија: 07.11.2016
Рецензент: Силвана Жежова
РЕЛЕВАТНИ ИЗВОРИ И БРОЈКИ
Написот почнува со податок за тоа колку Македонци работат на овој остров. Иако не станува збор за официјална бројка, сепак доаѓа од релевантен извор од заедницата на Македонци во Малта. На овој начин е поткрепено изнесено тврдење дека овој остров во последните години е сè попривлечна дестинација за работа за нашите млади. Од друга страна, претставува и своевидно „оправдување“ зошто токму Малта е избрана како тема за овој напис.
„Околу 5.000-6.000 Македонци престојуваат на Малта на привремена работа, а нивниот број достигнува и до 10.000 налето, велат, според неофицијална проценка, од заедницата „Македонци во Малта“. Овој медитерански остров во последниве години е сѐ попривлечна дестинација за нашите сограѓани што заминуваат да си ја пробаат среќата надвор од границите на Македонија“.
Понатаму во текстот се пишува за најчестите професии што нашите ги работат таму и низ лични примери се раскажува за животот на островот. Изјавите во новинарските текстови се важен сегмент бидејќи се потврда на изнесените тврдења и даваат посебна тежина на напишаното. Во исто време, преку примерите се прикажува и реалниот проблем кој Македонија го има со иселувањето на младите, кои во текстот се осврнуваат и на причините зошто си заминуваат:
„Македонија ја напуштив бидејќи се разочарав од функционирањето на институциите. Наидов на многу неправди, не можев да си ги валоризирам трудот и дипломите, па решив да си ја побарам среќата надвор од мојата држава. Некаде каде што те ценат поради тоа што си, што го знаеш и по она со кое придонесуваш за фирмата, а не по тоа од каде доаѓаш, кој стои зад тебе, кого го познаваш, чиј симпатизер си ако воопшто симпатизираш некого. За правник е многу поразително да работи во држава каде што нема владеење на правото. Едноставно ме фати инает да докажам дека може да се успее и без валкани игри, со труд и со чист образ – вели Магдалена“.
ПРИКАЗ НА РЕАЛЕН ПРОБЛЕМ
Текстот, исто така, се осврнува и на проблемот кој реално го имаат сите македонски државјани што сакаат да работат во друга држава, а тоа се регулираниот престој и дозвола за работа. Написот што го рецензираме нуди повеќе информации за тоа како ова прашање е регулирано во Малта. Во детали е објаснет начинот на кој Македонците кои се таму го регулираат престојот, што може да биде добра информација за читател кој можеби планира да работи во таа држава.
„Малта има комплициран систем за добивање дозвола за престој, односно работна дозвола, а државјанство е речиси невозможно да се добие ако сте странец. Магдалена, упатена од пријателите што веќе биле преселени таму, нашла работа уште пред да тргне од Скопје.- Како граѓани на земја што не е членка на ЕУ, имаме право да се задржиме таму 90 во 180 дена, односно може да престојуваме три месеци легално, па потоа мора да се вратиме на три месеци во Македонија, за да добиеме право на нови три месеци“.
Материјалот што го рецензираме претставува добар пример за новинарски текст кој третира прашање за иселување на младите. Текстот е поткрепен со бројки, изјави и со извори, ја дава приказната од сите агли и нуди реална слика за младите Македонци кои последниве години заминаа да работат на Малта.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
неофицијални
релевантни
повеќе извори
повеќестрани
СЕОПФАТНОСТ
сеопфатнo
нема прикриени информации
ПРИСТРАСНОСТ
целосно прикажува вистина
нема извртување на вистина (спин)
нема лажни информации
балансираност
КОМЕНТИРАЊЕ
нема коментаторски елементи
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
информира
креативен
несензационален
соодветен
јасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
нема мултимедијални елементи
има контекстуални линкови
стилски уреден
поврзан со тагови