Транспарентност е да одговараш и кога не те прашуваат
Објавено во Рецензии
on 14 - 04 - 2014 Автор: Александар Писарев[Рецензија на текст:
Ристовски најави многу позитивни работи за студентите и младите]
Непрофесионално е медиум да прави сензација од комуникација на министер од многу важен ресори со 273 фанови на ФБ и да го прикаже како транспарентен, зашто одговорил на поголем дел прашања. Каде е во цела оваа ФБ турлитава јавниот интерес? Ако ги погледнете прашањата кои му беа поставени на министерот, тие се однесуваат на лични и поединечни проблеми од типот, кога ќе се вработам, кога ќе стигнат стипендиите, ќе има ли партиципација за ова или она…
Линк до оригиналниот напис: Ристовски најави многу позитивни работи за студентите и младите
Датум и време на објавување: 08.04.2014, 17:23
Датум на рецензирање: 09.04.2014
Рецензент: Александар Писарев
ПЕПЕЛ ВО ОЧИ
Јасно е, и многу провидно дека целиот концепт е направен во полза на спинувањето за дотичниот министер и неговата патртија. „Одговорени беа голем дел од прашањата, а граѓаните најмногу се интересираа за отворање на нови дисперзирани студии, стипендии, задолжителни предмети во средно… Токму оние области во кои до сега се направени најголемите реформи, а на кои повторно во програмата на ВМРО-ДПМНЕ за 2014-2018 им е обрнато значително внимание“
Пред неколу дена пензионерите беа „движечка сила“ на државата, а сега тоа се студентите: „Младите и студентите во Македонија се движечка сила на државата… можат да очекуваат слободен четврток кога ќе имаат бесплатен превоз, бесплатен јавен и железнички сообраќај… да заминат во својот дом… посета на кина, театри“… пораката на авторот кој не се потпишал под оваа „реклама за министерот“ е јасна, секако, тоа можат да очекуваат само ако гласаат за ВМРО-ДПМНЕ.
ТРАНСПАРЕНТНОСТ Е ПОЛИТИЧКИ СТАВ, НЕ ОДГОВОР НА ПРАШАЊЕ
Транспарентност и достапност на информациите до граѓаните и нивното учество во работата на државните институции се основните постулати на Европската унија кон која толку многу тежнееме. Базата за транспарентно работење мораме сами да ја изградиме, а во тоа голема улога треба да одиграат и медиумите, но, секако, не на ваков начин и проследено со голема фотографија на министерот од партискиот штаб: „Министерот Ристовски апелираше до граѓаните и во следниот период своите прашања да ги напишат на неговата фејсбук страницата, а он ќе ја продолжи практиката на отвореност и транспаренстност во комуникација со граѓаните“…
Основата на транспарентна влада, министерство, министер, локалната самоуправа лежи во тоа граѓаните, како даночни обврзници, благовремено да ги добијат сите релевантни информации и да имаат увид во работата на државните органи, а не да бидат информирани само кога ќе побарат одговор на конкретно прашање. Тоа не е транспарентно владеење и медиумот тоа треба да го знае и на тоа да предупреди.
Според член 14 на Кодексот на новинарите на Македонија, новинарот морал да обезбеди и професионална дистанца од политичкиот субјект.
ПРАШАЊА БЕЗ ОДГОВОР
Според увидот на официјалната веб страницата на ресорот кој го води дотичниот „транспарентен“ министер (www.mon.gov.mk) нема одговори на многу прашања, па ни на оние кои во неколку наврати граѓаните и медиумите јавно му ги поставиле, на пример: „како се случи опремата наменета за научно криминалистичката лабораторија на Факултетот за безбедност да заврши наместо во образовен процес во МВР, како и зошто истата таква опрема набавена со европските пари заврши на Универзитето во Штип каде не постои Катедра за криминалистика?“
Со современата технологија денес на интернет можат да бидат достапни сите информации за работата на државните органи. На официјалната страница на министерството на чие чело е дотичниот министер нема ништо ни за јавни набавки, како што нема ни информации за која намена се, според Завршната сметака на буџетот за 2012 година, потрошени 146.336.636 денари од вкупно 284.351.000 денари приходи од донации во Министерството за образование и наука или за која намена Министерството зело заеми во висина од 117.631.470 денари. Транспарентноста во работата е една од клучните особини на одговорната власт и затоа постојат официјалните веб страници, а ФБ страницата треба, сепак, да биде повеќе за забава на ,инистерот и неговите 9.435 фанови а не официјален извор за медиумите.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
веродостојни наводи
ИЗВОРИ НА ИНФОРМАЦИИ
има евидентирани извори
неофицијални
нерелевантни
1 извор
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
информира
некреативен
сензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови