[Рецензија: ОКОЛУ 90.000 АЛБАНЦИ СЕ ИСЕЛИЛЕ ОД ДРЖАВАВА, АМА НЕ ПРИЈАВИЛЕ ВО МВР?]

Текстот што го рецензираме е премногу шпекулативен. За да оддаде чувство на вистинитост, тој мора да запази неколку новинарски елемeнти што тука  ги нема. Написот не нуди точни и проверени факти, нема издржана аргументација и не ги лоцира конкретно изворите на информации, туку користи непрецизна формулација „дознаваме неофицијално од извори во ДИК“, која не кажува ништо. Затоа што во овој распон од можни „поткажувачи“, хипотетички гледано, може да се најде кој било од лицата вработени во ДИК, па и тие што не мора де се поврзани со стручната работа на оваа институција.

Линк до оригиналниот напис: ОКОЛУ 90.000 АЛБАНЦИ СЕ ИСЕЛИЛЕ ОД ДРЖАВАВА, АМА НЕ ПРИЈАВИЛЕ ВО МВР?

Датум и време на објавување: 01.03.2016, 22:54

Датум на рецензирање: 03.03.2016

Рецензент: Владо Ѓорчев

РАСФРЛАЊЕ СО БРОЈКИ

„Нешто над 100 илјади полнолетни граѓани, државјани на РМ, кои се во базата на МВР ги нема во базите на другите 10 институции што ги споредува Државната изборна комисија, дознава „Дневник“ неофицијално од извори во ДИK.“

Текстот почнува шпекулативно, така и завршува. Неговата вистинитост е прилично проблематична. Си крои некоја своја математика, а воопшто не консултира релевантни статистистички анализи, конкретни експертски мислења, споредбени податоци…

Написот се расфрла со бројки, но не е наведено од каде се тие добиени. Нема линкови за тоа од каде потекнуваат информациите за иселени лица од одделни општини, кои се соопштуваат како сигурно точни:

„Според нашите информации, најголем број на вакви државјани има во Гостивар и тоа околу 10.000, следуваат Струга и Тетово со по 7.500, Kуманово – 4.500, Врапчиште 3.800, Боговиње со 3.400, Чаир – 3.000, Липково со нешто помалку од 3.000…“

Не се посочува ниту врз база на чии „првични анализи“ (формулација што е употребена во текстот) се заклучува дека:

„… веројатно се работи за луѓе што се иселени од државата пред неколку години, но кои не го пријавиле своето заминување во странство на повеќе од една година или од одредени причини или лоша евиденција излегува дека не соработувале со македонските институции.“

 

 ДЕМАНТ НА ПРОДЛАБОЧЕНАТА АНАЛИЗА

На ваквата „продлабочена анализа“ во која нема официјален став од Државната изборна комисија (ДИК), имаше демант токму од ДИК.

Оттаму велат:

„Државната изборна комисија во однос на процесот на вкрстени проверки на базите на податоци официјалните информации ќе ги објави по завршувањето на процесот на вкрстените проверки и по усвојувањето единствен извештај.

Сите други податоци, вклучувајќи го и текстот објавен во дневниот весник „Дневник“ од 2 март 2016 година, со наслов „Околу 90.000 Албанци се иселиле од државава, ама не пријавиле во МВР?“, во врска со горенаведеното се шпекулации и дезинформации.“

Коректно е што медиумот го пренел демантот, но тој е објавен со коментар и со повторените ставови:

„Kако што веќе објавивме, информациите што ги поседуваме се неофицијални и не се конечни, а се добиени од извори во Државната изборна комисија што учествуваат во прочистувањето на Списокот. Ваквите бројки се исфрлени при споредбата на базата на МВР со најновите бази на 10-те институции со кои се врши споредбата.“

Па, иако во написот во кој се објавува демантот од ДИК поточно се лоцира изворот на информации: „од извори во Државната изборна комисија што учествуваат во прочистувањето на Списокот“, сепак, тоа не го менува впечатокот дека материјалот што е предмет на нашата рецензија е непрофесионален и дека си зел право да биде и експерт и толкувач и сезнајко.