[Рецензија: Фрустрации, реваншизам и измислени скандали: Како Ременски го започна вториот мандат во МТСП?]

Овој текст воопшто и немал намера да го прикаже проблемот од сите аспекти, туку наменски да ја претстави сликата само од аголот на власта, притоа фрлајќи дрва и камења по министерката за труд и социјална политика, Фросина Ременски.

Линк до оригиналниот напис: Фрустрации, реваншизам и измислени скандали: Како Ременски го започна вториот мандат во МТСП?

Датум и време на објавување: 6.09.2016, 16:52

Датум на рецензирање: 07.09.2016

Рецензент: Владо Ѓорчев

ЕКЛАТАНТЕН НАПАД БЕЗ НОВИНАРСТВО

Материјалот што го рецензираме уште на самиот почеток ја критикува министерката Ременски:

„Нарушување на работната атмосфера, притисоци и обиди за скандали – Фросина Ременски го започна вториот мандат како технички назначен министер за труд и социјална политика исто така како што се однесуваше за цело време во текот на својот прв мандат на позицијата“.

Меѓутоа, ова критизерско четиво не нуди факти за искажаните тврдења, што ја доведува во прашање неговата вистинитост. Втората страна најверојатно воопшто и не била планирана. Текстот остава впечаток дека е наменски правен за да ја нападне министерката, без притоа да понуди соодветна аргументација. Со ваквиот начин на обработка и на пласирање на информациите се нарушени повеќе одредби од Кодексот на новинари, меѓу кои и првиот член, во кој јасно се наведува дека:

„Новинарот треба да објавува точни, проверени информации и нема да прикрива суштински податоци и да фалсификува документи. До колку информацијата не може да се потврди или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно“.

Без да биде побаран одговор од Министерството за труд и социјална политика, но и без посочени релевантни извори кои би сведочеле за работењето на оваа институција, написот пласира паушална информација, што натежнува од пристрасност. Тоа го прави со единствена цел – да ја дискредитира работата на министерката Ташевска-Ременски.

„Ова го сведочат наши извори од министерството во кое минатиот пат Фросина Ременски за цели седум месеци немаше ниту една позитивна мерка, а цел грст скандали поврзани со нејзината нестручност и партизација на министерството“.

Кога се пишува за одредена ситуација потребни се аргументи што ќе го докажат тоа и, секако, изјави од засегнатите страни. Онака, пак, како што е пласиран овој материјал, тој остава впечаток дека има цел по секоја цена да се оцрни првиот човек на институцијата.

НА ПОМОШ И МАГИЈА

„Со самото стапување на функцијата вработените се жалат дека техничката министерка и нејзините соработници повторно имаат план да ја преземаат улогата на жртви и да се бават повеќе со дезинформации и измислување скандали, отколку со организирање на работата во министерството. За ова доволен показател се првите 7 месеци на Ременски во МТСП кои изобилуваа со партиски вработувања и нула резултати од нејзина страна. Работници беа испуштани од работа, семејства не можеа да добијат социјални станови бидејќи наидуваа на сопки од тимот на Ременски. Дали тоа им е планот и за овој втор мандат во МТСП, останува да видиме. Според почетокот, веројатно Ременски и нејзините луѓе можат и полошо“.

Ова изгледа како магија! Кога само успеаја за еден ден вработените да се пожалат на новата министерка? Башка што во овој дел нема дека дополнителниот заменик-министер и минатиот пат кога Ременски беше министер, ѝ поставуваше сопки во работењето. Министерството за финансии не ѝ исплаќаше пари, што провладините медиуми го искористуваа во текстови за нејзино плукање. Секако дека овие аспекти текстот ги нема.

Целиот текст од почеток до крај е коментаторски. Без втората страна, необјективен и несодржаен. Ова е можеби муабет на колеги на своите работни места, но никако не смее да се најде на некој портал кој претендира да биде влијателен и професионален.