[Рецензија: УШТЕ ЕДЕН СКАНДАЛ ВО МВР: Оливер Спасовски им организирал „гага“ екскурзии на соросоидите со полицискиот хеликоптер!]

Класичен школски пример за спинување, етикетирање и за коментирање за да се прикаже поинаква реалност  без да се понудат релевантни докази. Со една реченица кажано, „плукање“ со лажни податоци.

Линк до оригиналниот напис: УШТЕ ЕДЕН СКАНДАЛ ВО МВР: Оливер Спасовски им организирал „гага“ екскурзии на соросоидите со полицискиот хеликоптер! 

Датум и време на објавување: 19.07. 2016

Датум на рецензирање: 20. 07. 2016

Рецензент: Димитар Тануров

НЕВИСТИНИТА ИНФОРМАЦИЈА

Уште од насловот може да се насети дека текстот ќе биде сензационалистички и коментаторски, а тоа се потврдува и со првиот пасус, во кој прво воопшто не се дава информацијата за која се однесува текстот, туку се коментира и се изнесуваат паушални податоци за поранешниот технички министер за внатрешни работи Оливер Спасовски.

„Освен тоа што Оливер Спасовски потрошил 175.000 евра на спроведување на крајно неуспешна акција, со која ги заплашуваше граѓаните и се фотографираше за медиумите со цел да се прикаже како „министер“ иако беше само технички, тој во МВР се однесувал како министерството да му е оставина од дедо му“.

Написот се темели на фотографија, која е објавена на 16 јуни на социјалната мрежа „Фејсбук“, а на неа е прикажан активистот Јане Стефановски и други личности како позираат пред полициски хеликоптер, со кој летале заради изведување скокови со падобран.

Во написот Стефанов се етикетира дека е дел од „соросоидната мрежа платеници“, кој  наводно, поради пријателството на Спасовски бесплатно летал на грбот на граѓаните и на МВР. Исто така, подолу во текстот се наведува и дека Спасовски со тоа ја злоупотребил функцијата и ги оштетил МВР и државата.

Сепак, фотографијата, како што може да се види и на социјалната мрежа, е направена на 16 јуни, а скокањето со падобран било дел од „Д-Фестивал“ во Дојран.

Колажот е направен од објави на групата „Сакам да скокам со падобран во Македонија“, на „Фејсбук“

Стефанов на својот личен профил подбивно одговори на текстот, наведувајќи дека падобранците биле ангажирани од градоначалникот на Дојран и оти хеликоптерот е издаден со дозвола на актуелниот министер Митко Чавков.

Објавата, според својата форма, би требало да претставува вест, но, за жал, поради тоа што во ниту еден момент нема поткрепа со факти, изјави и проверка на изнесените тврдења, не може да се класифицира како професионално сработен новинарски производ. Дури и во „жолтиот печат“, озборувањата се темелат на некакви проверени информации. Ова е само уште еден показател дека единствената цел на написот е да се оцрнат и да се дискредитираат Спасовски и Стефанов.

Со написот се кршат повеќе членови од Кодексот на новинари, кој налага објавување на точни и проверени информации, посочување на изворите и избалансирано и непристрасно информирање.

Член 1

Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно.

Член 4 

Новинарот ќе го назначи изворот на информациите, но ако изворот бара да остане анонимен, новинарот ќе го заштити.

Член 5

Новинарот ќе ги почитува законите во државата, но нема да објави или сокрие ништо што е во спротивност со јавниот интерес.

Член 7 

Новинарот ќе ја почитува приватноста на личноста, освен кога тоа е во спротивност со јавниот интерес.

Член 10

Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа.

 Член 13

Новинарот треба да прави разлика меѓу фактите и мислењата, меѓу веста и коментарот.

Член 15

Новинарот мора да ги негува културата на говорот и етиката. Неспојлива со новинарската професија е непримерната комуникација со јавноста.

Член 16

Новинарот ќе ги чува угледот и достоинството на својата професија, ќе ги поттикнува заемната солидарност и различност на ставовите и нема да го употреби својот медиум за пресметка со личности, вклучувајќи ги и своите колеги.