[Рецензија: ТИ Е*АМ ТОА ВЕЃАТА ГРУЗИЈСКА: Само Саше Шамарлитико го брани Алекс Ружин, сопартијците бришат под со синот на Нано Ружин!]

Текстот што е предмет на рецензија е насочен кон брутална дискредитација на членот на Либерално-демократска партија, Александар Ружин. Приватниот живот, како и неговите активности на социјалните мрежи воопшто не се од јавен интерес, па читачката публика да биде соочена со вулгаризми и со уличен јазик во статија која воопшто не може да се нарече новинарски производ, бидејќи не задоволува ниту еден стандард. Освен кон Александар Ружин (неговото правилно име не е употребено ниту еднаш во текстот), лични навреди се упатени и кон неговиот татко, поранешниот амбасадор, политичар и универзитетски професор Нано Ружин.

Линк до оригиналниот напис: ТИ Е*АМ ТОА ВЕЃАТА ГРУЗИЈСКА: Само Саше Шамарлитико го брани Алекс Ружин, сопартијците бришат под со синот на Нано Ружин!

Датум и време на објавување: 06.07. 2016

Датум на рецензирање: 13.07.2016

Рецензент: Силвана Жежова

САМО ДИСКРЕДИТАЦИИ, А НЕДОСТИГА ОСНОВНАТА ИНФОРМАЦИЈА

Написот само дискредитира, а не информира за каков резил на Александар Ружин станува збор и не се кажува јасно ниту дека тој е член на Либерално-демократската партија, за потоа членовите на таа партија, како што се вели во текстот, да „бришат под со него“. Од текстот не може да се утврди поради какви постапки или активности Александар Ружин е исмеан, а уште помалку се одговара на прашањето дали тие се од јавен интерес, односно дали граѓаните треба да бидат информирани за тоа. Меѓу другото, се дава и кратка информација за „бизнисот“ на Александар, при што неговиот татко е обвинет за шверц на автомобили, без да се понудат докази за тоа.

„Резилот кој го зафати синот на Нано Ружин, Алекс Ружин кој инаку се занимава со продажба на гуми и фелни кои ги увезува од земјите на Бенелукс (линк отворен од татко му додека беше амбасадор и шверцуваше автомобили), не престанува, а најсилниот удар пристигнува токму од неговите сопартијци кои на социјалните мрежи буквално го бришат подот со него, му фаќаат сеир и го исмеваат.“

Понатаму во текстот се објаснува кој застанал во одбрана на Ружин, а кој го нападнал – информации кои воопшто не се важни за јавноста, особено зашто станува збор за пренесување преписки на социјалните мрежи. Се изнесуваат информации за приватниот живот на инволвираните страни, што е сосема неважно во контекстот на јавниот интерес. Во текстот, на читателот му се нуди и избор – од понудените коментари на социјалните мрежи (пренесени како принтскрин) да избере свој. Во текстот, инаку, е избран „фаворит“.

„На овој смешен обид за одбрана на Ружин, следеше канонада од исмевање, меѓу кои најбрутлен во исмевањето беше братучедот на Шеќеринска кој напишал дека вака ќе му се направи голема штета на Нано Ружин, а со тоа и на цело ЛДП, мислејќи на човек партијата. По ова следеше мрсулавење и плачење од страна на Алекс Ружин кој се обиде да во „вразуми“ Наумовски и да го подучи дека немањето солидарност била причината поради која тие не можеле да дојдат на власт!“

Написот што е предмет на рецензија настанал како резултат на одредени активности и преписки на Александар Ружин на социјалните мрежи. Темата што се третира воопшто не е од јавен интерес и не може да биде предмет на новинарски текст кој претендира да ги запази стандардите на пишувањето. Оттука, статијата не е ништо друго туку уште еден обид она „рекла-кажала“ од социјалните мрежи да донесе уште еден клик на медиумот кој ги преточува како содржина.