[Рецензија: Спасовски манипулира како Заев: За него кршењето на крстот не е нарушување на јавниот ред и мир]

Овој текст е класична спинерска конструкција, креирана за да се оцрни техничкиот министер за внатрешни работи, Оливер Спасовски. За таа цел се искористени само две секунди од одговорот на Спасовски на новинарско прашање, поврзано со тензичните настани во Бутел ( кои настанаа по поставувањето камен-темелник за 55-метарски крст, кога за малку ќе дојдеше до судир на две групи граѓани), при што комплетно се изместува контекстот на неговата изјава.

Линк до оригиналниот напис: Спасовски манипулира како Заев: За него кршењето на крстот не е нарушување на јавниот ред и мир

Датум и време на објавување: 6.03.2016, 17:47

Датум на рецензирање: 10.03.2016

Рецензент: Владо Ѓорчев

СЕЧЕНО – ЛЕПЕНО

Се работи за тенденциозно и селективно прикажување на мал фагмент од изјавата на Спасовски, каде тој, меѓу другото, вели:

„… немавме нарушување на јавниот ред и мир…“(0,23 до 0,25 минута од видеоснимката)

Потоа, од ова исечено парче од две секунди, се прави  запалив политички спин и се соопштува дека  Спасовски, наводно, кажал дека:

„… кршењето и сквернавењето на местото каде беа осветени темелите на крстот во Бутел, не било нарушување на јавниот ред и мир.“

А за што, всушност, станува збор?

Одговарајќи  на новинарско прашање дали полицијата поднесе пријави за вчерашните и за завчерашните протести (3 и 4 март 2016 г.), министерот вели:

„Прво сакам да оддадам признание на полицајците коишто беа на настаните. Да оддадам признание затоа што најпрофесионално ја извршуваат својата задача и што немавме нарушување на јавниот ред и мир. Нормално дека ќе има постапки за одредени случаи. Знаете дека имаме тројца повредени полицајци. Утрово бев кај еден од нив во клиниката за да го видам и да ја дадам поддршката. Нормално дека тие постапки ќе завршат и ќе се поднесат соодветните пријави за нарушителите на овој процес. Најважно од се е дека граѓаните беа на висина на задачата. Навистина, луѓето коишто се вклучија, коишто разговараа и коишто го подпомогнаа процесот да имаме мирна разврска, да се повлечат демонстрантите и да ја обезбедиме сигурноста на граѓаните на Република Македонија, посебно на општината Бутел. Тоа е од исклучителна важност и навистина треба да се честита на присебноста и на смиреноста заради тоа што ова време во Република Македонија е време во кое треба да се носат рационални и разумни одлуки, а не одлуки на ниво на емоции.“ (од 0,10 до 1,17 минута од видеоснимката)

Од одговорот на Спасовски се гледа дека тој воопшто не дал таква „фрапантната изјава“  дека кршењето и сквернавењето на местото каде беа осветени темелите на крстот во Бутел, не било нарушување на јавниот ред и мир, како што се тврди во насловот и во првата реченица од текстот.

ДОЛЕВАЊЕ МАСЛО

Но, тоа не е единствениот проблем со оваа нагласено пристрасна и манипулативна содржина. Вториот дел од објавата го прикажува Спасовски  како  министер кој ем „нема капацитет да раководи со полицијата“ ем „применува двојни аршини“, во конкретниот случај, за двете групи граѓани (Албанци и Македонци) кои протестираа во Бутел.

„Демонстрантите во четвртокот наместо да бидат спречени во вандализмот им беше дозволено да го пробијат безбедносниот периметар, да кршат огради, палат дрвја и узупираат простор. Епилог од ваквото однесување на Спасовски беа неколку илјади Албанци кои дивееја и поставија шатори над осветените темели за крстот. Тие кршеа и палеа пред себе, а извикуваа и пееја националистички песни. Иако агресивни, албанските екстремисти ги обезбедуваше само обична униформирана полиција, специјалците беа оддалечени, а кратко потоа беа оставени да прават што сакаат без никакво присуство на безбедносните сили.

Само еден ден подоцна, Спасовски пушти полиција кога на местото се собраа жителите Македонци да го искажат револтот од ваквото сквернавење.“

И пишуван во ваков потпалувачки манир, текстот дополнително провоцира и долева масло на огнот. Сосема спротивно од принципите на професионалното новинарсво кои  укажуваат дека новинарските написи не смеат да говорат со јазикот на омразата и да  поттикнуваат на насилство.