Сензационализам од бајата (дез)информација
Објавено во Рецензии
on 1 - 08 - 2016 Автор: Владимир Мирчески
[Рецензија: Третата светска војна е почната – маринец открива кој стои зад нападот во Париз и кој е Обама (Видео)]
Сензационализам, чист сензационализам – тоа е главното погонско гориво на овој текст. Изнесената апокалиптична содржина се базира само на согледувањата на еден човек, со проблематична историја, без притоа да се наведе каде, кога и за кого таа личност ги изјавила своите ставови. Значи, очигледно преземен текст без да се наведе од каде, без каква било професионална задршка или обид да се доразјаснат наведените тврдења.
Линк до оригиналниот напис: Третата светска војна е почната – маринец открива кој стои зад нападот во Париз и кој е Обама (Видео)
Датум и време на објавување: 28.07.2016, 23:00
Датум на рецензирање: 30.07.2016
Рецензент: Владимир Мирчески
ТЕШКА ШПЕКУЛАЦИЈА
Ако некој медиум објавува непроверена и ептен бајата информација која се темели на изјава на еден човек со дискутабилно минато – поранешен американски маринец, а вие само ја преземете и ја преобјавувате за домашната публика, тоа не значи дека се намалува тежината на вашето соучесништво во пласирањето шпекулации, зашто овој текст е, да бидеме искрени, сепак, тешка шпекулација. Ваквиот пристап е спротивен на принципите утврдени во новинарскиот Кодекс.
Доколку информацијата не може да се потврди или станува збор за претпоставка, односно шпекулација, тоа треба да се каже и да се објави.
Точноста на информацијата треба да се провери колку што е тоа можно. (член 1)
Прво, настапот на ексмаринецот, е стар повеќе од девет месеци. Поточно, станува збор за негово гостување кое се случило веднаш по парискиот масакр лани во ноември. Значи, стара вест, која со месеци подоцна е преземена од некоја веб-страница, која пак, најверојатно, е изворот на конкретниот напис што ја препишал старата информација од А до Ш, без тоа јасно да го наведе.
Плагијаторството е неприфатливо (член 12)
КОМПРОМИТИРАН ИЗВОР
Второ, изјавата на поранешниот војник е за „Прес ТВ“ (PRESSTV), иранска телевизија во сопственост на државата, чиј менаџмент директно му одговара на врховниот верски лидер во земјата – актуелниот ајатолах. Оттука, лесно е да се извелече врската меѓу антиамериканската и антизападната реторика на некогашниот маринец и неговите теории на заговор за масонско-ционистичко-финансиско здружување на неколкумина против целиот свет, која, пак, се емитува, ете, случајно каде, ако не на медиум спонзориран од држава која не е баш во добри релации со западниот свет. Значи, пристрасноста веднаш се наметнува како прашање.
Трето, „авторитетот“ за глобални заговори е извесен Кенет О’Киф, како што кажавме, поранешен член на вооружените сили на САД, кој, ете, по завршувањето на војничката кариера се нафатил со сосема поинаков бизнис – хуманитарно-медиумски – објаснувајќи ја темната страна на светската политика со негирачки однос кон холокаустот во Втората светска војна. Значи, изворот е многу компромитиран за само врз неговите изјави да се темели цел текст кој помпезно се „кити“ со претенциозен наслов:
„Третата светска војна е почната – маринец открива кој стои зад нападот во Париз и кој е Обама“
Од наведеното не е многу тешко да се заклучи дека станува збор за „каша-попара“ од напис, со стара информација, едноставно препишан, без какво било вклучување на новинарскиот сенс. Накусо, ептен лош производ кој не добива преодна оценка.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
делумно
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
има евидентирани извори
неофицијални
нерелевантни
1 извор
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
целосна копија
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
несоодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
нема мултимедијални елементи
нема контекстуални линкови
делумно стилски уреден
неповрзан со тагови