Рецензираме петнаесетина реда, нешто што не е потпишано и што не може да се дефинира дали е вест, информација, коментар, колумна. Уште полошо, тоа што е напишано не знаеме ни дали е точно ни на кого прецизно се однесува, дали на лидерот на опозицијата, Зоран Заев, кој е обвинет за неуспехот на преговорите во Брисел, или на медиумите кои ја „креирале“ неговата позиција и кои се оквалификувани како негови и на Сорос, и кои го „диктираат темпото и рамката на разговорите во Брисел“.

Класична медиумска манипулација „со еден удар да се отепаат две муви“ и читателите да се убедат во нешто што не е вистина, а страната чија позиција ја бранат да се амнестира од одговорност за неуспехот и за можните последици од тој неуспех.

Линк до оригиналниот напис: Заев ја турка државата во нова поголема криза

Датум и време на објавување: 11.06.2015, 10:40

Датум на рецензирање: 11.06.2015

Рецензент: Александар Писарев

НОВИНАРСКИ ТЕКСТ ИЛИ ПАРТИСКО СООПШТЕНИЕ

Не е првпат да се наоѓаме пред дилема дали рецензираме новинарски производ или партиско соопштение. Имаме многу причини за ова.

Политичките текстови, особено ако се однесуваат на опозицијата и на нејзината дисквалификација, редовно се непотпишани и аналогни на партиските соопштенија или конференции за печат на партијата која е на власт. Тоа произлегува уште од самиот наслов, во кој категорички се тврди дека Заев ја турка државата во нова поголема криза. Манипулација е забележлива и на фотографијата од која со помош на фотошоп е исечен лидерот на владејачката партија за да се засили кај читателите чувството на одговорност само кон спротивниот табор.

Медиумот применува тактика на бајачка и видовито и таксативно ги набројува „последиците што ќе ни се случат“ поради однесувањето на лидерот на опозицијата, Зоран Заев. Владејачката партија однапред ја амнестира од одговорносот за тие последици.

„Со уривањето на преговорите Зоран Заев прави неповратна штета и ја турка државата во уште поголема криза.„

„Со ваквата разврска, на државата ѝ се заканува:

– Губење на препораката од ЕУ.

– Назначување специјален пратеник од ЕУ што значи дека државата се става во групата земји со безбедносен и политички ризик.

– Изолирање, како и неповратна економска штета, несигурност за граѓаните и за инвеститорите, запирање на реформите, нетрпеливост и продлабочување на тензијата.“

ЧУВАРИ НА ФОТЕЛЈАТА

Непотпишаниот автор со отворена пристрасност и со спинување на она што во овој момент е најбитно за власта, се става во улога на чувар на фотелјата на премиерот. А, со заплашување на граѓаните од „последиците“, воедно ги мобилизира на чија страна треба да бидат. Новинарски апсолутно некоректен текст и спротивен на основните принципи и на етичките вредности на Кодексот на новнарите на Македонија, кој во член 14 повикува на непристрасно и избалансирано известување од политичките процеси.

„Заев ги демантираше неговите медиуми финансирани од Сорос, коишто ширеа лаги дека премиерот Никола Груевски прифатил техничка влада и негово повлекување и единствено отворено прашање бил периодот на негово повлекување. Заев самиот изјави дека Груевски не се повлекол. Со ова медиумите на Сорос уште еднаш покажаа дека лажат и манипулираат.“

Овој недефиниран новинарски производ содржински е нецеловит, хаотичен и конфузен. Нема никаков извор или соговорници со кои би можеле да се потврдат некои изнесени тези, како таа дека, наводно, опозицијата ги урнала преговорите. Колку што е познато, ништо не е урнато, само, како што изјави портпаролка на Јоханес Хан, Маја Коцијанчиќ, не е постигнат договор, што не значи дека во следната рунда нема да се постигне. За неуспехот, барем, според официјалните изјави што доаѓаат од Брисел, никој не е обвинет, само е побарано лидерите да се однесуваат одговороно и да направат обид да се пронајде решение за кризата.

Од почетокот на преговорите, учесниците се обврзале на молк за она што зад затворените врати се разговара. Дали страната чии интереси отворено ги штити медиумот, не го прекршува овој договор и не им дошепнува на новинарите детали што им одат во прилог или би сакале да им одат во прилог на оние кои се на власт?