Рецензија: Заеднички договорено да се остави повеќе простор за подготовка на средбата Јункер – Груевски
Објавено во Рецензии
on 27 - 02 - 2015 Автор: Оливера Војновска
Основната задача на новинарите е да ја почитуваат вистината и правото на јавноста да биде информирана во согласност со член 16 од Уставот на Република Македонија.
Почитувајќи ги етичките вредности и професионалните стандарди во пренесувањето на информациите, новинарите ќе бидат чесни, објективни и точни.
Право и должност на новинарите е да настојуваат да ја спречат цензурата и искривувањето на вестите.
Токму овие главни принципи, утврдени во Преамбулата на новинарскиот Кодекс и на кои треба да се темели новинарската професија, целосно затаиле во веста што ја рецензираме. Овој материјал има цел да ја скрие „шлаканицата“ од Брисел. Па, тргнувајќи од таа идеја, наместо да ја пренесе информацијата дека „претседателот на Европската комисија Жан Клод Јункер ја откажал средбата со премиерот Никола Груевски, закажана за в четврок (26.02.2015)“, на јавноста ѝ соопштува дека средбата била одложена по „заедничка проценка на двете страни“! Со ваквата, само навидум, мала „козметичка“ интервенција, се прави суштинска повреда на вистината и се изместува тежиштето на пораката од Брисел.
Линк до оригиналниот напис: Заеднички договорено да се остави повеќе простор за подготовка на средбата Јункер – Груевски
Датум и време на објавување: 23.02.2015, 17:11
Датум на рецензирање: 24.02.2015
Рецензент: Оливера Војновска
ИЗВИТОПЕРЕНА ВЕСТ
Станува збор за целосно преземен материјал (заедно со насловот) од државната информативна агенција и објавен без никаква новинарска доработка, а кој на гледачите им подметнува невистинита информација.
Оваа вест се темели само на изјава на владиниот портпарол, според кој, средбата Груевски–Јункер (која беше најавена минатиот петок, 20 февруари 2015 година, од портпаролот на ЕК на редовна прес-конференција, а беше ставена и на дневниот распоред за 26 февруари), е откажана по заеднички договор.
Но, тоа е само едната страна на приказната.
Во текстот воопшто не се споменува дека портпаролот на Европската комисија, Мина Андреева, на прес-конференција во Брисел информираше дека претседателот на Европската комисија, кој доаѓа од сестринските народни партии, ја откажал оваа прва средба со македонскиот премиер.
Според Андреева :
„во моментов не е соодветно да има средба поради развојот на ситуацијата во Македонија“.
Не е за верување дека не се знаело за „изненадувањето“ од Брисел кое стаса претходно во текот на денот. Како што не е тешко да се претпостави зошто во написот го има само објаснувањето од Владата. И, зошто уште во насловот се прави спинерска конструкција со која веста се става на браникот на одбрана на власта – премиерот.
Несомнено, мотивите за извитоперувањето на правата информација не се новинарски, туку политички. Од друга страна, ваквиот непрофесионален пристап во пласирањето на веста изгледа дури смешен, па наиде и на потсмев на социјалните мрежи. Бидејќи, и покрај обидите за креирање виртуелна реалност, „ студениот туш“ од Брисел не можеше да се затаи. Лошата вест, сепак, стаса до македонската јавност.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
целосна копија
наведен извор без линк
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови