Рецензија: Во студентскиот дом „Гоце Делчев“ се откачил лифт од 8-кат со студент во него
Објавено во Рецензии
on 10 - 02 - 2014 Автор: Мирослава СимоновскаОвој текст претставува школски пример за неодговорно и паушално новинарство, кое ги нема усвоено професионалните принципи, кои, пак, од своја страна, предвидуваат претпоставува проверка на информациите и консултирање извори. Информацијата дека се откачил лифт во студентскиот дом и дека имало студент внатре, не е точна.
Медиумот не е сандаче за електронска пошта, па секое анонимно писмо што ќе пристигне вербатим да го пренесе. Што му е работа на новинарот, ако не проверката на информациите?
Членот 1 од Кодексот на новинари ја воспоставува основата на новинарската работа.
„Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно“.
Новинарот кој го објавил овој текст, сосема потфрлил во извршувањето на својата работа, а предизвикал и штета, за што ќе објасниме во рецензијата.
Линк до оригиналниот напис: Во студентскиот дом „Гоце Делчев“ се откачил лифт од 8-кат со студент во него
Датум и време на објавување: 05.02.2014, 19:23
Датум на рецензирање: 07.02.2014
Рецензент: Мирослава Бурнс
Вистинитост: Информацијата дека се откачил лифт со студент во наведениот блок во студентскиот дом „Гоце Делчев“ е невистинита. Таа е објавена на повеќе портали, базирана на анонимно писмо од студент или некој што така се претставува, но новинарот не ја проверил и вербатим ја пренел, како што е напишана во анонимното писмо. Ова е неодговорно, поради две причини. Најнапред, поради тоа што во студентскиот дом живеат илјадници студенти кои имаат родители и второ, поради обврската на новинарот да ги проверува информациите колку што е тоа можно. Понатаму, неточната информација е објавена неколку дена по наводниот термин кога се случил „падот“ во домот, бидејќи и анонимното писмо е пратено неколку дена подоцна, но тоа не е објаснето во насловот и првичниот впечаток е дека падот се случил дента кога е објавена оваа дезинформација.
Извори на информации: Нема извори, иако текстот е базиран на анонимно писмо кое беше испратено на мејл до повеќе редакции.
Содржајност: Иако студентскиот дом „Гоце Делчев“ остава впечаток на совршено место за снимање хорор филмови и иако пред една година таму навистина се откачи лифт во летниот период кога немаше студенти внатре, сепак, тоа не ги прави основани причините на непотпишаниот новинар и на медиумот да поверуваат во вистинитоста на анонимното писмо без притоа да го проверат.
Текстот ги содржи сите потребни одговори на петте основни новинарски прашања, со единствениот проблем – ниеден од нив не е вистинит. За да се зголеми напнатоста и „ексклузивноста“ во овој неодговорен медиумски производ внесени се и детали за тоа како студентот си ја удрил главата во плафонот за да стане текстот поуверлив и поверодостоен. Повторно – неточно, таков настан не се случил. Пристигна и демант од Државниот студентски центар.
Коментирање: Непотребно се максимизира „катастрофата“ што се опишува преку следниот коментар:
„Лифтот се задржал само неколку метри над приземјето, и студентот удрил со главата во плафонот и завршил со помали повреди. Но, сигурно доживотно со себе ќе носи трауми.“
Оригиналност/Плагијат: Текстот е објавен на повеќе веб-портали. Медиумот не го објаснува тоа и не се повикува на ниеден медиум при најверојатното копи-пејстирање.
Квалитет на насловот: Насловот е ирелевантен бидејќи фактот што го презентира е лажен.
Фотографија: Станува збор за општа фотографија од која може да се заклучи за кој објект се пишува.
Заклучок: Неодговорно, непрофесионално и паушално новинарство. Работа на новинарот му е да ги проверува информациите и да консултира повеќе од еден извор. Принципот на Би-Би-Си е да се консултираат три независни извори за да се потврди веродостојноста на информацијата. Тоа би значело – еден студент сместен во „Гоце Делчев“, управата на домот, Државниот студентски центар, Студентскиот парламент и ако има потреба МВР. Ништо од тоа не е сторено во овој мрзелив производ, со што е нанесена штета на професијата преку дезинформирање на јавноста и особено е нанесена штета на семејствата на оние кои се сместени во домот.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
аноними
нерелевантни
1 извор
еднострани
СЕОПФАТНОСТ
несеопфатнo
не е точна
ПРИСТРАСНОСТ
не ја прикажува вистината
неодговорно и непроверено информирање
лажни информации
не аплиактивно
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
делумна копија
ненаведен автор
КВАЛИТЕТ НА НАСЛОВОТ
дезинформира
сензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
стилски уреден
поврзан со тагови