Рецензија: Владата продолжува да инвестира во студентските домови
Објавено во Рецензии
on 17 - 03 - 2014 Автор: Југослава Дуковска
Во најмала рака цинично зазвучува насловот на веста која донесува исказ на ресорниот министер за состојбите во студентските домови во Република Македонија. Но, тоа очигледно не го тангира авторот, па истиот исказ е извлечен и повторен и во поднасловот.
Кога ќе се земат предвид грозоморните слики на руинираните простории, нехигиената и крајниот стадиум на запуштеноста во која се наоѓаат сместувачките капацитети за студентската популација во државата, што беа вистински „хит“ во домашните и светски медиуми деновиве, на читателот веднаш му се наметнува едно логично прашање: ако на ваков начин Владата „инвестирала“ во студентските домови досега, зарем има логика да се фали дека на истиот начин и ќе продолжи? Токму оваа „поента“ на министерот Спиро Ристовски од насловот генерираше негативни коментари и критики во таа насока во јавноста, пред сѐ, на социјалните мрежи.
Самата вест е направена аматерски и претставува пренесување на исказот на Ристовски во врска со темата, но нема некои од основните елементи на една вест: кога, каде.
Линк до оригиналниот напис: Владата продолжува да инвестира во студентските домови
Датум и време на објавување:13.03.2014, 13:55
Датум на рецензирање: 14.03.2014
Рецензент: Југослава Дуковска
Прикриени, во случајов се сите, „неважни детали“, како, на пример, кога и каде говорел ресорниот министер Ристовски, дали се работи за пренесен дел од прес-конференција или медиумот сам го побарал министерот да одговори на прашања поврзани со очајната состојба со студентските домови во државата. И во првиот и во вториот случај написот е склопен така што нема поширок контекст од кој читателот би разбрал зошто Ристовски токму сега зборува на оваа тема.
Спинот, евидентен во написов, во овој случај би можел да „увери“ само кај некој крајно неинформиран читател кој нема основни сознанија во каква состојба се студентските домови во Македонија. За сите останати, клучното тврдење е, во најмала рака, иронично.
Насловот некритички и пристрасен, а над сѐ друго – циничен, посебно кога ќе се земе предвид реалната состојба на студентските домови во Македонија. Акцентот е ставен на делот од исказот на ресорниот министер, каде тој вели дека Владата продолжува да инвестира во студентските домови, што, гледајќи ги ужасните сцени од руинираниот студентски дом „Гоце Делчев“, звучи трагикомично. Во овој случај насловот е во функција на алиби на власта која не ги исполнила своите ветувања.
Веста е некомплетна и се стекнува впечаток дека нејзината единствена намена е да ја спинува реалноста околу долгогодишната запуштеност на студенските сместувачки капацитети и неисполнетите ветувања, кои власта ги даваше во врска со реновирањето на студентските домови изминативе неколку години.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови