[Рецензија: Турбо агенда на Груевски: Премиерот е меѓу народот и го исполнува ветеното]

Да, навистина е турбо овој текст, ама турбо-реклама за премиерот. Ова е некаков си преглед на настаните на кои присуствувал првиот човек на Владата во изминатите денови. Прашањето е што т.н. преглед е пристрасен до таа мера што се проблематизира „новинарскиот“ карактер на целиот напис.

Линк до оригиналниот напис: Турбо агенда на Груевски: Премиерот е меѓу народот и го исполнува ветеното

Датум и време на објавување: 10.08.2015 – 14:25

Датум на рецензирање: 12.08.2015

Рецензент: Владимир Мирчески

БЕСПЛАТНА РЕКЛАМА ЗА ПРЕМИЕРОТ ВЛЕЗЕН ВО КАМПАЊА      

Овој материјал е показател дека во последно време за дел од медиумите тенка е, ако и воопшто ја има, границата меѓу бесплатното политичко рекламирање и легитимниот новинарски текст. Неразбирливо е како написи, како конкретниот, поминуваат како кредибилни четива на разно-разни информативни портали. Па, само насловот да се прочита веднаш станува јасно за какво ЕПП станува збор – „Турбо агенда на Груевски: Премиерот е меѓу народот и го исполнува ветеното“. Ова не го вели партијата на власт или, пак, Владата, туку самоиницијативно, а можеби и нарачано, се констатира во текстот! Како аргументи се користат појавувањата на премиерот на неколку „ударнички акции“, сечења ленти, најави за нови проекти… Поточно, премиерот, кој очигледно е веќе влезен во кампања за априлските избори, си добива бесплатно медиумско покривање.

„Исполнување на ветеното е врвна карактеристика во политиката. Во изминативе три дена, премиерот Груевски реализираше проекти од кои директна полза ќе имаат граѓаните. Груевски пушти во употреба реконструирано училиште што е дел од досега рекоунструираните вкупно 350 училишта, пушти во употреба водовод, беше поставен камен-темелник на колекторски систем, ја посети ТИРЗ Охрид-Струга каде што наскоро ќе влезат 2 фабрики и ќе отворат 2.000 работни места, го посети Плаошник каде се гради капитално дело, пушти во употреба 2 згради со 40 социјални станови, беше предадена во употреба нова плажа, најави дека ќе се зголемат пензиите, дека се почнува со изградба на пет регионални патишта- инвестиција вредна 22 милиони евр, како и дека продолжува проектот за бесплатен одмор на деца од социјални семејства.“

Фалби, фалби, фалби на секоја страна. Впечатокот е дека премиерот се претставува како „политичка Мајка Тереза“, безгрешен, без мани, посветен на „исполнување на ветеното“. Во ниту еден момент во текстот не е вклучен новинарскиот нерв за да се прочепка, провери дали сета таа агенда и работа е реална, делумно реална или, пак, не корeспoндира со фактичката ситуација. Еве, конкретно за посетата на плажата на Стење, во јавноста се појавија поинакви информации од таа што тука ни се пласира – дека случката била однапред подготвена за премиерот. Дека сè е насочено кон „ликот и делотo“ на претседателот на Владата, потврдува и фактот дека единствените цитирани изјави во написот се токму неговите во кои тој, нормално, нема самиот себеси да се критикува, туку напротив ќе си се фали:

„Одговарајќи на новинарски прашања при посетата на плажата во Стење, истакна дека ќе се реконструираат патните правци Битола – Ресен – Буково, Смоларе – Мокрино, Брвеница – Гостивар…

– Покрај овие пет регионални патишта, континуирано работиме и на автопатиштата. Таму работите одат добро, нема застои се се движи со добра динамика, според планираното. Работите и на патиштата и на автопатиштата се одвиваат со добра динамика и согласно планот, нагласи Груевски.“

Јасно е дека материјалот презентира, има една и само една страна, а тоа е онаа премиерската. Тогаш за каква евентуална објективност би зборувале, ја нема во какви било, а камоли во мали траги.

Новинарот мора да обезбеди професионална дистанца од политичките субјекти – член 14 од Кодексот на новинари.

Долгите и, за мене, како читател, неоправдано долги и здодевни цитирани изјави само од шефот на Владата, на моменти се разбиени со констатции кои всушност се чисти коментари:

„Симултанката на премиерот Груевски започна во петокот…

Сето ова покажува дека Груевски е меѓу народот и ги исполнува проектите кои што ги вети, со работа и посветеност одговара на предизвиците и исполнување на она што е зацртано во програмата, проекти од кои народот има корист.“

Новинарот треба да прави разлика меѓу фактите и мислењата, меѓу веста и коментарот – член 13 од Кодексот.

Да резимираме: само една страна, само еден извор, коментари, фалби – класично предизборно политичко рекламирање.