Од „петни жили“ се брани омилен политичар
Објавено во Рецензии
on 4 - 10 - 2015 Автор: Оливера Војновска
[Рецензија: Трајановски ги демантираше манипулациите на Жерновски: Кејот кај ГТЦ нема да биде транспортна улица]
Пред нас имаме нагласено пристрасен напис кој од „петни жили“ се труди да го одбрани градоначалникот на Скопје, Коце Трајановски. Всушност, текстот изгледа како да се става во улога на „адвокат“ на Трајановски, истовремено фрлајќи „дрвја и камења“ по градоначалникот на Центар, Андреј Жерновски.
Линк до оригиналниот напис: Трајановски ги демантираше манипулациите на Жерновски: Кејот кај ГТЦ нема да биде транспортна улица
Датум и време на објавување: 30.09.2015, 14:26
Датум на рецензирање: 01.10.2015
Рецензент: Оливера Војновска
А ПРЕСОТ НА ЖЕРНОВСКИ?
Нападите кон градоначалникот на Центар почнуваат уште со тендециозниот наслов – во кој се тврди дека се работи за „манипулации на Жерновски“, а потоа се нижат критики и низ целиот напис.
Паѓа в очи тоа што текстот се потпира само врз изјавата на Трајановски, која е точно пренесена. Но, неговиот настап, фактички, е одговор на прес-конференцијата на Жерновски, која, пак, е невидлива во текстот.
А, на оваа прес-конференција тој информираше дека:
„до општинскиот Совет доставил одлука за забрана на градежни активности во опфатот помеѓу реката Вардар, улица Вовјвода Васил Аџиларски, улица Димитрија Чуповски, улица Македонија, Плоштад Македонија и Камени Мост.“
Така што, имаме една нелогична ситуација, во написот ја има реакцијата на прес-конференцијата, а не е пренесен ниту збор од самата прес-конференција!
Меѓутоа, овој политички некоректен материјал воопшто немал намера да ја опфати и втората страна (Жерновски), туку да ја нападне дека шири „лажни обвинувања“ и:
„во трка по политички поен плус манипулира со најавите за градба на улица на Кејот на Вардар.“
КОЦЕ – ЧИСТ КАКО СОЛЗА!
Текстот е така правен да ја релативизира изградбата на улицата на Кејот 13 Ноември кај ГТЦ, при што креира перцепција дека Жерновски го напаѓа скопскиот градоначалник само од политички побуди и без никаква друга причина:
„Тој (Жерновски) пред граѓаните претставува слика дека таму ќе се гради транспортна улица, а вистината е дека Кејот кај ГТЦ ќе стане модерно уреден простор под посебен режим со бекатон плочки.“
Понатаму во написот се нагласува и дека за оваа пристапна улица „нема да се издвојат средства од градската каса туку се работи за приватен инвеститор“. Сепак, не се посочуваат многу други моменти за да можат граѓаните да добијат појасна претстава за целиот случај.
Така, на пример, не се кажува дека улицата со посебен режим на сообраќај (како што одлучи Советот на Скопје на 22 септември 2015 година), ќе се протега од улицата Филип Втори до зградата на „Телеком“. Дека таа ќе биде наменета за потребите на новите згради на плоштадот Македонија, но и за тие околу плоштадот. Дека деновиве реагираа и сопствениците на угостителските објети на кејот. Дека, според првичните планови, улицата требаше да биде подземна, а потоа со промени на деталниот урбанистички план „Мал ринг“ (во 2012 година) таа стана надземна. А, исто така, не се споменува ниту тоа дека приватниот инвеститор на улицата е компанијата „Дивелоп груп“ – инвеститор и на зградата во која е сместен „Телеком“.
И, несомнено, ваквото внимателно дозирање на информацииите не се прави случајно, туку за да се претстави градоначалникот на Скопје „чист како солза“!
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
делумно
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
информира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови