Рецензија: Топ ПЕТ бизниси во Македонија осудени на неуспех!
Објавено во Рецензии
on 24 - 10 - 2013 Автор: Југослава ДуковскаКако еден од поновите информативни портали во македонскиот медиумски простор, порталот Фактор претставува позитивен исчекор поради приоритетот што им ги дава на темите од областа на економијата, финансиите и бизнисот воопшто, па објавениот текст на тема кои бизниси во Македонија се осудени на неуспех разбирливо привлекува внимание.
Текстот има добра структура, интересен приод, солидна аргументација, пишуван е во лесен и разбирлив стил, прифатлив за поширок аудиториум. Детектира глобални трендови, кои се рефлектираат и на домашниот бизнис амбиент, што го прави уште поинтересен за читателската публика. Темата е атрактивна, а написот нуди практични информации, но опасноста да биде сфатен како само уште едно лесно четиво, а не како професионално обработена тема, лежи во тоа што на текстот му недостасуваат цитирани извори и компетентни соговорници. Без нив, презентираните факти, колку и да „држат вода“, не можат да се сметаат за верифицирани и едноставно ја немаат потребната тежина за да можат овој напис да го извлечат од морето на површно сработени теми, со кои изобилува медиумскиот простор.
Линк до оригиналниот напис: Топ ПЕТ бизниси во Македонија осудени на неуспех!
Датум и време на објавување: 20.10.2013
Датум на рецензирање: 22.10.2013
Рецензент: Југослава Дуковска
Вистинитост: Не може да се утврди веродостојноста на фактите со кои оперира авторот на текстот, иако звучат уверливо и аргументирано.
Извори на информации: Најголемиот недостаток на написот е токму недостатокот на извори. Пропуштено е да се наведе како е дојдено до сознанијата што ги пласира во текстот. Тоа што аргументите звучат здраворазумски и што читателите најверојатно ќе се согласат со напишаното, бидејќи се поклопува со нивните искуства и сознанија од секојдневниот живот, не му ја подобрува кредибилноста на овој новинарски производ.
Квалитет на насловот: Насловот е доволно илустративен за содржината што ја донесува текстот за да го привлече вниманието на читателот, но и премногу општ за да биде атрактивен.
Фотографија: Написот е илустриран со една воведна и пет тематски фотографии, кои се умешно одбрани, но воведната се повторува и како илустрацијата на петтиот бизнис, што го намалува ефектот на добрите фотографии.
Заклучок: Доказ дека и текстовите со економска и бизнис тематика можат да бидат интересни за читање за поширокиот аудиториум е овој напис и за него, како и за сите други информативни форми на новинарско изразување важи едно едноставно, универзално правило, а тоа е верификација на фактите. Таа се прави преку повикување на релевантни извори за да се објасни од каде е дојдено до информацијата која се објавува, па и читателот да може да се увери дека она што се пишува е точно и веродостојно. Без овој важен елемент, написот има проблем со кредибилноста.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
сеопфатнo
нема прикриени информации
ПРИСТРАСНОСТ
целосно прикажува вистина
нема извртување на вистина (спин)
нема лажни информации
балансираност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
не информира
некреативен
несензационален
соодветен
јасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови