[Рецензија: Шекеринска мора да и каже на јавноста што знаела за криминалниот Протокол кој обрзува да нема тендер за трет мобилен оператор]

Текстот има една цел, а тоа е да го наруши угледот на Радмила Шекеринска, која е мета на хајка последниве денови за скандалот со „Маѓар телеком“. Притоа, половина од написот се прашања на кои нема одговор ниту новинарот, ниту јавноста.

Линк до оригиналниот напис: Шекеринска мора да и каже на јавноста што знаела за криминалниот

Датум и време на објавување: 13.09.2015, 15:03

Датум на рецензирање: 15.09.2015

Рецензент: Владо Ѓорчев

Иако Шекеринска уште при првиот текст објавен за наводна нејзина инволвираност во овој скандал веднаш демантираше, во овој напис не се нашло за потребно да се пренесе тоа.

Инаку, таа имаше демант во кој се вели:

„Чудо! Не сакајќи, „Република„ ме испофали! Во документот кој го објавуваат (читајте го оригиналот) се потврди:

– дека сум инсистирала на брзи рокови за либерализација на телекомуникацискиот сектор во Македонија

– дека предлозите од Маѓар Телеком не сум ги поддржала (законот кој го нуделе останал нивен предлог, не поддржан од мене ниту институцијата која сум ја раководела) и

– дека на седницата на Влада не им помина законот по ќеиф на Маѓар Телеком туку закон усогласен со ЕУ обврските на Македонија (и предлагам на Владата да ги објави снимките од таа седница за да се види зошто и како Маѓарите не го добија тоа што го сакаат).

Документите покажуваат дека многумина во Македонија се спротивставија на криминалните зделки и привилегираната позиција на МТ – горда сум што бев една од тие.

Очекувам Република да ги дообјави документите од истиве сведочења, вклучувајќи ги и конкретните имиња и функционери врзани за „Аналитико“. Шилото повторно врти!“

Втората работа која, исто така, боде очи е тоа што засегнатата страна, пак, воопшто не е застапена во текстот. Нема никакви индиции дека е направен обид да се добие каква било било изјава од Шеќеринска.

„Документите од аферата Телеком, кои се достапни на судот во Њујорк и од кои Република досега објави само мал дел, покажуваат поинаква слика на Радмила Шекеринска. Документите укажуваат дека лично од раководството на Маѓар Телеком и на Македонски Телекомуникации, на Шекеринска и бил даден нацрт закон, подготвен со единствена цел да се продолжи монополот на Македонски Телекомуникации, да продолжи осиромашувањето на македонските граѓани преку нереално високи цени за телефонија и интернет, а да продолжи богатењето на тогашните политичари на власт. Дали Шекеринска пријавила дека Атила Сендреи, осомничениот за оваа криминална афера пред македонските судови, и доставил таков закон? Дали се обратила до Јавното Обвинителство дека директор на приватна компанија и приоѓа со изготвен закон кој сака да биде изгласан на Влада? Доколку Шекеринска го пријавила овој случај, Република со задоволство ќе ја повлече веста, но јасно е дека тоа не се случило. Шекеринска треба да се потсети дека нејзиниот пријател Зоран Талер заврши во затвор токму затоа што се согласи да поднесе законски акти во интерес на приватна компанија.“

Идејата на целиот текст не е да пренесе објективна информација за наводна вклученост на Шекеринска во аферата со поткуп од „Маѓар телеком“, туку да ѝ се извалка името. Тоа се гледа и од селективното прикажување на информациите. Имено, според сведочењето на поранешниот разузнавач Слободан Богоевски, инволвираност нема само од опозициски политичари, туку има наводна поврзаност на високи функционери и од владејачката партија.

Текстот е политички пристрасен, а е конструкција од претпоставки. Затоа и е невистинит. Четиво кое има само една цел – да омаловажи опозициски политичар.

Може да се заклучи дека ова е површно одработена новинарска задача која не успева да одговори на дел од главните професионални предизвици. Во него има сериозна доза на манипулација и спин, пласиран во насловната конструкција која ја дезинформира публиката.

Кога новинарскиот текст е со дневно-политичка намена, сите новинарски стандарди паѓаат во вода.

Насловот пласира шпекулација која е наменета за дискредитирање на личноста на конкретен политичар, со отворена навреда дека за поддржувачите на СДСМ ќе било шокантно ако Радмила Шекеринска остане заменик-претседател на партијата. Намерата да се дискредитираат Социјалдемоктарскиот сојуз како партија, но и конкретна личност е нескриена.