Написот пренесува поенти од интервјуто на Тито Петковски, дадени за ТВ станицата „24 Вести“ на тема грчко-македонскиот спор околу името. Но, авторот, кој не е потпишан, не останува само на пренесеното, туку коментира нешто што Петковски не го изговорил и од тоа извлекува заклучоци. Тие го наведуваат читателот да заклучи дека Петковски би направил нешто што инаку е неприфатливо и непопуларно кај пошироката јавност, што индиректно го оцрнува.

Дополнително, Петковски се дискредитира и со паушална и преувеличена констатација дека за своите ставови тој и претходно бил „осуден од целата македонска јавност“.

Пристрасноста можела да биде избегната доколку беа изоставени коментаторските елементи и фокусот бил само на она што Петковски навистина го изјавил.

Линк до оригиналниот напис: Тито Петковски подготвен за попустливост пред грчките уцени

Датум и време на објавување: 03.07.2013, 12:55

Датум на рецензирање: 04.07.2013

Рецензент: Југослава Дуковска

Вистинитост: Доколку се занимаваше само со фактите изнесени во интервјуто на Петковски, авторот немаше да дојде во ситуација да биде доведена во прашање веродостојноста на наводите во написот.

Извори на информации: Единствениот извор на информации е конкретното ТВ интервју на Тито Петковски.

Содржајност: Сомнежот дали можеби прикрива информации, во случајов произлегува од некоректното пренесување поенти од интервјуто на Тито Петковски. Евидентни се обидите на авторот да го пишува и она што Петковски не го кажал, туку тој, авторот, заклучил дека „е јасно“ за што станува збор.

Пристрасност: Коментаторските елементи во написот имаат ефект на дискредитација на Петковски како политичар и не е реално да се очекува новинарот тоа да не го разбрал. Поради тоа, ова извртување на вистината укажува на политичка пристрасност кај авторот на написот.

Коментирање: Коментарите на авторот на текстот се интегрирани во информацијата, па текстот треба внимателно да се чита за да се види што Тито Петковски навистина изјавил.

Квалитет на насловот: Насловот на текстот го одразува пристрасниот пристап на авторот кон материјата која ја обработува.

Фотографија: Текстот е илустриран со понова фотографија на Тито Петковски, кој зборува и гестикулира и е коректна илустрација во недостиг на оригиналната снимка од ТВ интервјуто.

Говор на омраза: Евидентен обид за политичка дискредитација на Петковски по прашање на неговиот став за потребен компромис околу името со Грција претставува сугестијата на новинарот дека отстапките за кои зборува Петковски „јасно е дека се промена на името идентитетот и јазикот на македонскиот народ“.

Заклучок: Информација која се состои од прераскажани поенти на нечие интервју или јавен настап не е непозната новинска категорија. Но, како и кај сите, така и во овој случај, мошне е важно поентите, односно клучните реченици коректно да бидат пренесени и да не бидат коментирани, односно да биде запазена потребната дистанца на новинарот од пренесената содржина.

Едно од основните правила на новинарството е исказите на другите луѓе да бидат пренесени точно и коректно како цитати или, пак, парафразирани така што да не ја изгубат смислата и точноста. Најмалку, пак, прифатливо е во уста да им се ставаат работи кои тие не ги изговориле, а потоа тие да се коментираат произволно.

Во овој случај авторот не само што си дал за право да коментира, туку тие коментари се тенденциозни, насочени кон дискредитирање на субјектот со чие интервју тој се занимава.

Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).