Рецензија: Темза пред излевање, најризично во Британија
Објавено во Рецензии
on 11 - 02 - 2014 Автор: Оливера Војновска
Неретко се случува во медиумите да налетаме на наслови кои онака на прв поглед ќе нè изнасмеат. Веста што ја рецензираме е токму со таков наслов: „Темза пред излевање, најризично во Британија“. Во насловот е направена крупна грешка која не го остава читателот рамнодушен, просто изнудува коментар. Веднаш се појавуваат извичници и прашалници, па само по себе се наметнува прашањето: а каде освен во Британија има ризик од излевање на Темза!?
Линк до оригиналниот напис: Темза пред излевање, најризично во Британија
Датум и време на објавување: 10.02.2014, 12:44
Датум на рецензирање: 11.02.2014
Рецензент: Оливера Војновска
Вистинитост: Веста е преземена од Државната информативна агенија – МИА, ја пренесоа повеќе други медиуми и нема проблеми со вистинитоста.
Извори на информации: Како извор на веста е наведена МИА , која пак, се повикува на соопштението на Биританската агенција за човекова околина.
Содржајност: Иако се работи за куса преземена вест, не може да се каже дека е целовита. Таа делува некако конфузно и збунувачки. Во неа се забележуваат истите пропусти како и во оригиналната вест. Видливо е дека при правењето на текстот не е направен напор да се „стегне“, односно да се среди за да биде појасен. Како на пример овој фрагмент:
„На удар се областите Беркшир и Сари, на која и припаѓаат и југозападните делови од Лондон, главниот град на Велика Британија, засега, не се наоѓа меѓу локциите кои се под закана, но 2500 домови во областа Сари се означени како мошне ризични“
Така што, од самата вест не може точно да се разбере дали има опасност од излевање на Темза во Лондон, или нема.
Оригиналност/Плагијат: Наведено е дека се работи за вест од МИА, но не е посочен линк.
Квалитет на насловот: Насловот е најпроблематичниот елемент во веста. Од брзање, или од незанење е направен гаф:
„Темза пред излевање, најризично во Британија“
Изборот на поднасловот, исто така, е лош.
„Рекрдно високо ниво по должината не целиот тек бележи реката Темза во последните 30-тина години.“
Придавката „рекордно“ во случајов е несоодветно избрана. Имено, таа повеќе одговара кога се работи за истакнување на некаков позитивен напредок или резултат. Подигнувањето на нивото на реката Темза не може да се третира како некаков рекорд, иако таков пристап во известувањето имаа речиси сите медиуми.
Фотографија: Како илустрација за веста е употребена фотографија од Вестминстерскиот мост во Лондон, симната од интернет без да се наведе изворот.
Заклучок: Насловот прозвучува како оваа река на својот пат до Северното Море да поминува низ кој знае колку држави! А, со оглед на тоа дека се работи за преземен материјал, било потребно само да се има малку повнимателен пристап и веста ќе беше коректна. Брзоплетоста, пак, на сметка на точноста и прецизноста, резултира со голема грешка, поради која веста стана предмет на потсмев на социјалните мрежи каде испровоцира коментари од типот:
„За разлика од Британија, ризикот од излевање на Темза во Намибија е значително помал“
„Во Франција вршат веќе евакуација?“
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
не може да се утврди
ПРИСТРАСНОСТ
не може да се утврди
нема извртување на вистина (спин)
нема лажни информации
балансираност
КОМЕНТИРАЊЕ
нема коментаторски елементи
ПЛАГИЈАТ
целосна копија
наведен извор без линк
КВАЛИТЕТ НА НАСЛОВОТ
не информира
некреативен
несензационален
несоодветен
нејасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови