[Рецензија: Расправија во СДСМ, кој е крив за неуспехот?]

Текстот што го рецензираме покажува колку се поважни партиските и лични интереси од јавниот интерес и од она што е важно за граѓаните. Во еуфоричниот триумфализам поради „пропаст“ на референдумот за ГТЦ, медиумот без ниеден факт, без повикување на каков било извор, на граѓаните им дава искривена слика од настанот и го опишува како причина за наводниот хаос во опозицијата, со што, всушност, го демаскира целиот спин во полза на власта.

Авторот само малку да ја согледал и анализирал реалната состојба и резултатите од гласањето на референдумот и да ги почитувал начелата на објективното новинарство, сигурно немаше да го напише ова. Особено зашто претседателот на Државната изборна комисија ги демантира со својата изјава сите наводи што се објавени во текстот.

Според тоа, непотпишаниот автор, и оној кој му наредил да напише ваков текст, треба да се покријат и да молчат.

Линк до оригиналниот напис: Расправија во СДСМ, кој е крив за неуспехот ?

Датум и време на објавување: 26.04.2015, 21.13

Датум на рецензирање: 27.04.2015

Рецензент: Александар Писарев

АКО КОЗА ЛАЖЕ…

„Мачна и тензична е атмосферата во опозициските редови, каде се води жестока дискусија за тоа дали неработењето на Андреј Жерновски и немањето на проекти или пак лажните анкети кои ги објави агенцијата „Рејтинг“ на Ѓорѓи Спасов се криви за жестоката шлаканица кои денеска Зоран Заев и Андреј Жерновски ја добија од граѓаните на Центар.“

Ова е главната констатација на медиумот врз основа на која се базира целиот обид да им се сервира на граѓаните конструкција за хаосот и „пропаста“ на опозицијата поради лошите политики на градоначалникот на скопската Општина Центар, Андреј Жерновски, заради што, како што објаснува текстот, граѓаните биле „потполно незаинтересирани за оваа инцијатива“.

Создавајќи атмосфера на избори, текстот ги дисквалификува опозициската партија и лидерот на СДСМ. Авторот брза да ги наброи и другите „виновници“ и да ги сумира изборните резултати на СДСМ во изминатите две децении, иако станува збор за референдум и за една локална иницијатива.

„Дополнително, неуспешниот референдум во Центар, кој воедно значи и 11-ти пораз во низа за опозицијата, дебакл на политиките на Жерновски и пораз и за Заев, Шекеринска и Милчин, па сега на секој начин се бара виновникот за ваквото фијаско на опозицијата чија деструктивност е директно казнета.“

И овојпат е искористена шанса, што според Кодексот на новинарите на Македонија не е дозволено, за пресметка со своите колеги, па за „фијаско“ на референдумот е обвинет и новинарот Бранко Героски.

РОГ НЕ ЛАЖЕ

„На почетокот го спомнавме претседателот на Државната изборна комисија. Има ли пореферентен извор за резултатите на гласање од него-нема. Авторот тоа требало да го има во вид бидејќи Никола Рилковски, вели дека владејачката партија ВМРО-ДПМНЕ го бојкотираше референдумот за ГТЦ, дека партиското членство било под притисок да не излезе на гласање и дека тоа е причината зошто не се постигна цензуот од 50 отсто за референдумот да биде успешен. Да беа избори опозицијата ќе имаше комотна победа. Тој вели дека, доколку се спореди со локални избори, излезноста од 40 отсто говори дека имаме комотна победа на опозицијата, и за градоначалникот и во бројот на советници. Според него оваа бројка е најголема за опозицијата до сега. Тој посочува дека неуспехот на референдумот за ГТЦ, се должи и на непрочистениот избирачки список и дека во него има гласачи од Пустец, т.н. фантомски гласачи, починати и граѓани со повеќе лични карти.“

НА ШТЕТА НА ГРАЃАНИТЕ

И во овој случај се среќаваме со доминација на партиските интереси на штета на интересите на граѓаните во медиуимите, што стана правило во овдешната политичка култура, а што претставува најгрубо можно кршење на основните начела на новинарските кодекси. Искористување на ФБ-коментари да се омаловажи еден демокртаски процес и да се искористи за дискредитирање на опозицијата, со заговарање дека мислењето на власта е единствено исправно, во овој случај е патоказ за едноумие и за одбрана на одредена политика за сметка на професионалното информирање.