Слика прикажана само од аголот на власта
Објавено во Рецензии
on 10 - 09 - 2015 Автор: Оливера Војновска
[Рецензија: Подобри услови и намалени трошоци – поставен камен темелник на државното станбено претпријатие]
Извештајот од поставувањето камен-темелник за новата административна зграда на Акционерското друштво за стопанисување со станбен и деловен простор (АДСДП) ги нагласува позитивните аспекти од изградбата на објектот – дека ќе се подобрат условите за работа на административците и ќе се намалат трошоците за кирии. А, тоа што изградбата ќе чини 8,5 милиони евра го соопштува дури во последната реченица од прилогот, како да станува збор за некоја минорна сума!
Линк до оригиналниот напис: Подобри услови и намалени трошоци – поставен камен темелник на државното станбено претпријатие
Датум и време на објавување: 07.09.2015, 16:22
Датум на рецензирање: 08.09.2015
Рецензент: Оливера Војновска
ПАРИ ЛИ СЕ ОСУМ И ПОЛ МИЛИОНИ ЕВРА?!
Имено, написот информира за официјалниот почеток на изградбата на новата зграда на државното станбено претпријатие (поранешно ПУИК), која ќе се протега на градежна парцела од 1.547 квадратни метри, ќе биде на шест ката и приземје, со вкупен административен простор од 6.400 квадратни метри и девет деловни простории.
Во него се прецизно посочени изворите и точно се пренесени настапите на премиерот и на директорот на АДСДП, но се забележува интенцијата да се пофали потегот на Владата (премиерот).
Затоа, фокусот се става на фрагменти од изјавите во кои се истакнува дека се работи за економски оправдана инвестиција, која освен заштеди за кирии и за сметки (ќе биде енергетски ефикасен објект), ќе носи и профит. И ваквата порака ја испраќа уште со насловната конструкција, која е од два дела и е предолга.
Информацијата, пак, за вредноста на вкупната инвестиција на објектот од 519 милиони денари, ја маргинализира и ја поттурнува сосема на крајот од текстот.
А, токму за ова имаше реакција од СДСМ, од каде забележуваат дека нема потреба да се потрошат повеќе од осум милиони евра за изградба на административна зграда на АДСДП.
„Нови простории може да се обезбедат со многу помалку пари, преку поскромен објект, современ и енергетски ефикасен, согласно најновите стандарди“
Но, овој прилог не го пренесува соопштението од најголемата опозициска партија, туку ја прикажува сликата само од аголот на власта.
А, ПРОЕКТОТ ОД ПРЕД ТРИ ГОДИНИ?
Инаку, специјализираниот портал кој обработува теми од градежништвото, „Билд“ (Build.mk) во текстот со наслов „Равенка со многу непознати е новиот „барокен“ објект на АДСДП“, потсетува дека Министерството за транспорт и врски пред три години распиша оглас за продажба на локацијата каде што се бараките на АДСДП на улицата Орце Николов во Дебар-маало.
Во него се наведува дека на оваа локација од 5.675 квадратни метри беше планирано подигнување на две згради со приземје, четири ката и со потпокрив, со деловни простории на површина од 19.395 квадратни метри. А, од целокупниот канцелариски простор АДСДП преку јавно–приватно партнерство со домашен или странски партнер, можеше да обезбеди бесплатни 4.000 квадратни метри за сместување на вработените.
Текстот забележува и дека „засега никој од надлежните институции не излегува со информации зошто не е реализиран овој проект“.
Овие моменти кои воопшто не се споменуваат во прилогот што го рецензираме, несомнено, даваат поинаква претстава од таа што се креира во јавноста дека изградбата на овој објект е полн погодок – се прави на вистинско место во вистинско време!
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
2 извори
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
нема лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
информира
некреативен
несензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови