[Рецензија: Почнува судењето за насилниците од СДСМ кои ја тепаа полицијата]

Рецензираме прилог со кој се најавува почетокот на судскиот процес против девет лица, кои беа приведени во протестите што се одржаа пред Владата на 5 мај, но тоа се прави на непрофесионален начин. Иако судењето допрва треба да почне, овој необјективен материјал си дава за право да „суди“ дека токму тие се личностите што „ја тепаа полицијата“. Притоа, ги квалификува како „насилници“ и, макар што нема докази дека се членови на најголемата опозициска партија, ги етикетира дека се од СДСМ. Тенденциозноста е особено видлива во некоректниот наслов, во кој непотврдени обвинувања се пласираат како стопроцентна вистина.

Линк до оригиналниот напис: Почнува судењето за насилниците од СДСМ кои ја тепаа полицијата

Датум и време на објавување: 21.05.2015, 16:59

Датум на рецензирање: 21.05.2015

Рецензент: Оливера Војновска

„НАСИЛНИЦИ  И ТЕПАЧИ“!

Веднаш паѓа в очи тоа што прилогот нема искрена намера на јавноста да ѝ пренесе точна информација за случајот со притворените демонстранти кои треба да се појават пред судот. И содржинскиот дел и инсертите се така избрани за овие луѓе  да се претставаат како агресивни кон полицијата. При тоа, не се ни споменува зошто имало протести и кој бил поводот.

Од написот не може да се разбере дека  протестите се против полициската брутaлност и дека почнаа истиот ден (5 мај), кога опозицијата ја објави 29. политичка  „бомба“, која, според лидерот на СДСМ, говори „како власта го прикривала убиството на Мартин Нешковски“ . И дека по обелоденувањето на овие прислушувани разговори граѓаните почнаа да се собираат пред Владата преку повици на социјалните мрежи.

Иако во написот се посочени реакциите на невладината „Цивил“ и на СДСМ, сепак, прилогот држи само една линија. Кусата изјава од опозицијата е искористенa за да се направи конструкција со која осомничените демонстранти ќе се стават во негативен контекст.  Па, подготвен во тој дух, прилогот  со чудење констатира како:

„СДСМ и натаму тврди дека лицата од овие снимки се невини!“

Исто така, забележливо е дека прилогот  бегло поминува покрај фактот што меѓу притворените и осомничените демонстранти има и студенти. Овој момент, всушност, го нотира само преку соопштението на „Цивил“, од кое, пак, воопшто не се пренесува делот каде невладината организација реагира дека:

„Телефоните на притворените се земени без судски налог, а тоа е кршење на закон“

ПРИЛОГ ВО УЛОГА НА „СУДИЈА“

Според  интонацијата и начинот на кој е пласиран текстот, тој остава впечаток  како да е ставен во улога на „судија“,  кој  е наклонет на едната страна – онаа на полицијата.  Интересно е што медиумот еден ден пред почетокот на судењето дошол до „докази од истрагата“ од:

„кои јасно се гледа кој ги повредува полицајците“

Ваквиот начин на информирање е спротивен на новинарските и на етичките стандарди, според кои известувањето за судските процеси мора да биде ослободено од сензационализам:

Во судските постапки треба да се почитува принципот на пресумпција на невиност, да се известува за сите инволвирани страни во спорот и да не се сугерира пресуда (амандман 8)

Инаку,  истите „докази од истрагата“ во процесот против  студентите (демонстрантите), „спонтано“ беа објавени во уште неколку други медиуми кои ја поддржуваат владејачката партија. Тоа укажува на тоа дека ваквите медиумски содржини, исто така, „спонтано“ се инспирирани од некој политички  центар.