„Платениците на Сорос“ – добро научена мантра и етикета за секоја манџа
Објавено во Рецензии
on 25 - 03 - 2015 Автор: Владо Ѓорчев
[Рецензија: Нервозниот Заев, СДСМ и платениците на СОРОС со сценарио за дестабилизација на Македонија преку „Ал Џезира“]
Ова е уште еден текст кој оцрнува и омаловажува, притоа не ги согледува фактите, а во поголемиот дел и ги злоупотребува. Написот манипулира, извртува вистина, спинува. Нема критички осврт, нема дебата во текстот, дури и на колегите новинари кои се напаѓаат не им е дадено правото да се „одбранат“. Тоа значи дека текстот уште на почетокот го крши членот 16 од Кодексот на новинари:
Новинарот ќе ги чува угледот и достоинството на својата професија, ќе ги поттикнува заемната солидарност и различноста на ставовите и нема да го употреби својот медиум за пресметка со личности, вклучувајќи ги и своите колеги.
Линк до оригиналниот напис: Нервозниот Заев, СДСМ и платениците на СОРОС со сценарио за дестабилизација на Македонија преку „Ал Џезира“
Датум и време на објавување: 20.03.2015, 16:40
Датум на рецензирање: 24.03.2015
Рецензент: Владо Ѓорчев
ДЕФОКУСИРАЊЕ ОД ВИСТИНАТА
„СДСМ е соочен со немањето ефекти и поддршка од народот како што се надеваа и очекуваа. Заев нервозен и исплашен од доказите кои се против него, се обидува Македонија да ја втурне во дестабилизација, меѓуетнички и меѓуверски тензии.“
Уште на почетокот текстот спинува и не ја кажува вистината. Иако се тврди дека нема ефeкти и поддршка од народот, не се нудат докази за тоа. Нема објавено анкета на јавното мислење со која би се поткрепила ваквата теза. Притоа, не е објаснето што тоа очекувале од СДСМ за да може да се провери што не добиле. Очекувањата, според најавите на опозицијата, беше да се дознае вистината за Македонија. Тоа и се прави. Затоа, паѓа во вода обидот да се спинува дека ништо не се постигнува. Напротив, се дознава за криминалите кои ги правеле одредени луѓе во владата на премиерот Никола Груевски. За тоа дали Заев е нервозен, нема стручна анализа за да се поверува во вистинитоста. Вака, мислењето е паушално, а можеби и е помешано со чувството на упорност кое навистина текстот го оддава.
Понатаму, се вели дека опозицијата сака да го вовлече народот во сопствениот пад. Напротив. И лидерот на СДСМ, Зоран Заев, речиси на сите прес-конференции истакнува дека нема да дозволи дестабилизација на земјата, а сето тоа што го прави е во интерес на Македонија. Тука е злоупотребена оваа теза за да се поентира политички и да се дефокусира вниманието од вистинскиот проблем, а тоа е содржината на прислушуваните разговори.
Потоа се оцрнуваат и СДСМ и Фондацијата „Отворено општество Македонија“ (Сорос) со теза дека прилогот на телевизијата „Ал Џезаира“ бил антимакедонски, како и телевизијата.
Како и од каде е моментот дека телевизјата е антимакедонска? Оваа телевизија ја има во повеќе држави, а тезата дека има антимакедонски интереси е повеќе смешна отколку сериозна. Ако некои опозициски насторени личности дебатираат во една емисија, тоа не значи дека телевизијата има намера да ја руши и дестабилизира Македонија. Напротив, таа се вклучува во конструктивна дебата за да може да се дојде до решение. Значи, ги согледува проблемите меѓу разговор со луѓе, засегнати, а со тоа дава и придонес во дебатата за минимизирање или целосно неутрализирање на болните ткива во општеството.
Фразата „платениците на Сорос“ остана навика во провладините медиуми кога сакаат да напаѓаат луѓе кои не им се по мерка. Притоа, воопшто не водат сметка за тоа што значи таа фраза, туку ја лепат како етикета. Таа етикета потоа сите провладини перјаници ја употребуваат како добро научена мантра и ја пикаат во секоја манџа, најчесто каде што не ѝ е место.
Во делот каде што неосновано се напаѓа колегата Борјан Јовановски за тоа што рекол „Словени“ направена е материјална грешка. Тој зборува за поделбата во земјата која е направена, особено последните години. А, како поинаку на странец би можело да му се претстави таа разноликост и поделба на мислењата. Згора на сѐ, текстот само ја покажува интенцијата целосно да се негира и словенското присуство во потеклото на овој народ.
Ова е уште еден текст кој има цел негативна кампања. Целиот е со изместени гледишта, без логика. Текст без идеја, само со цел. Да се нападне по секоја цена.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
не може да се утврди веродостојноста на наводите
ИЗВОРИ НА ИНФОРМАЦИИ
има евидентирани извори
неофицијални
нерелевантни
не може да се утврди
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
не може да се утврди
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор, наведен извор без линк
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови