Рецензија: На Гинекологија се родиле четири бебиња со неодреден пол
Објавено во Рецензии
on 11 - 11 - 2013 Автор: Зоран Бојаровски
Овој новинарски текст ја заслужи оваа рецензија од повеќе причини: изборот на темата говори за креативноста на авторката во изборот и во генерирањето идеи за новинарски стории, бидејќи темата има интересен агол, таа е несекојдневна и интересна, и е обработена сеопфатно со интересни детали.
Линк до оригиналниот напис: На Гинекологија се родиле четири бебиња со неодреден пол
Датум и време на објавување: 07. 11. 2013 – 13:55
Датум на рецензирање: 09. 11. 2013
Рецензент: Зоран Бојаровски
Вистинитост: Начинот на кој е изработена оваа новинарска мини истражувачка сторија не остава простор да се сомневаме во нејзината вистинитост.
Извори на информации: Инспирирачкиот момент на оваа сторија е веста објавена во истиот медиум на 1 ноември оваа година под наслов: „Нема веќе или машко или женско: во Германија создадена категорија ’трет пол’“. Оваа вест на Би-Би-Си говори за тоа како во Германија го решиле парадоксот на запишувањето на двополовите, односно како што политички коректно се афирмира термниот – интерсексуалност во матичните книги. Една во секој случај необична, несекојдневна и занимлива тема, која кај авторката на текстот што го рецензираме тука предизвикал професионален импулс да го испита овој феномен во нашата земја. И љубопитноста еве, како што читаме, дала резултат.
Авторката на текстот консултирала, најверојатно, стручни лица во Клиниката на гинекологија и акушерство, во Детската клиника/Оддел на ендокринологија и генетика. Велиме „најверојатно“ зашто не се наведени име и презиме на изворите и нивната експертиза, но собраните факти и мислењата се доволно уверливи.
Содржајност: Овој новинарски продукт е повеќе од содржаен. Во една релативно куса новинарска форма се собрани сите неопходни информации за да може и лаик да го разбере овој феномен. Има статистика од релевантна институција, стручниот јазик е транформиран во разбирилив, говорен јазик соодветен за широка публика и, на крајот, има „додадена“ вредност со објаснувањето на коренот на термините кои доаѓаат од грчката митологија.
Оригиналност/Плагијат: Оригинален текст кој е добар пример за иновативност во изборот на новинарските теми.
Квалитет на насловот: Добар, провокативен наслов со „јадица“.
Фотографија: За фотографијата нема податоци. Таа е најверојатно од интернет „банките“ со фотографии. Или, можеби, од архивата на медиумот, но тоа не го знаеме.
Заклучок: Да заклучиме со една поента што ги поврзува инспирирачкиот текст за овој што го рецензираме, оној објавен во Би-Би-Си, а пренесен во овој исти медиум. Се работи за новинарскиот инсктикт да се проверат, споредат и анализираат темите што се актуелни на глобално рамниште, или во некоја друга културна средина, како функционираат локално. Во овој случај каква е статистиката на раѓањето на новороденчињата со интерсексуалност во Македонија, каква е праксата на запишување на овие бебиња во матичните книги и какво е мислењето на стручната јавност во однос на овие појави.
Пристапот на авторката на текстот што го рецензираме на овој аспект на новинарската пракса е професионален со истенчено чувство за препознавање на занимлива тема и со соодветно користење на новинарските алатки таа тема да се разработи сеопфатно.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални, аноними
релевантни
повеќе извори
повеќестрани
СЕОПФАТНОСТ
сеопфатнo
нема прикриени информации
ПРИСТРАСНОСТ
целосно прикажува вистина
нема извртување на вистина (спин)
нема лажни информации
балансираност
КОМЕНТИРАЊЕ
нема коментаторски елементи
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
информира
креативен
несензационален
соодветен
јасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
има контекстуални линкови
делумно стилски уреден
неповрзан со тагови