Рецензија: Момчињата кај Рампа возеле со 200 на час?! (ФОТО)
Објавено во Рецензии
on 24 - 10 - 2013 Автор: Мирослава СимоновскаПред нас имаме вест објавена непосредно по сообраќајна несреќа во која има петмина загинати. Времето на објавување на информацијата е важно од аспект на засегнатите страни во случајот, поточно од аспект на почитувањето на болката на семејствата на жртвите. Токму поради тоа, главната забелешка во текстот е тоа што се темели на неофицијални извори како и непроверени информации.
Независно од тоа што шпекулацијата дека двајца од загинатите се браќа, не е вистинита, сепак, вреди да се спомене дека ова е информација која лесно се проверува и нејзината вистинитост може да се докаже, доколку новинарот вложи труд, без да се потпира на претпоставки.
Трката за ексклузивна информација, ја прави веста невтемелена на официјални извори, иако фактите за кои се говори може да бидат лесно проверени со неколку повици во полициска станица.
Линк до оригиналниот напис: Момчињата кај Рампа возеле со 200 на час?! (ФОТО)
Датум и време на објавување: 11.10. 2013 12:09
Датум на рецензирање: 22.10.2013
Рецензент: Мирослава Симоновска
Вистинитост: За голем дел од фактите не може да се каже дека е завршена новинарската работа, бидејќи единствениот факт во текстот за кој е утврдено дека е точен е тоа дека пет момчиња загинале. Секој друг факт во текстот е без проверка, шпекулативен, а за информациите кои се лесно проверливи и се основната причина поради која новинарите се ангажираат кога станува збор за известување од сообраќајни несреќи, не е направен напор да се проверат, туку новинарот се потпира на неофицијални извори и непоткрепени тврдења.
Извори на информации: Наведено е дека изворот е неофицијален. Иако овој вид извори се легитимни и водат до „вествредни“ информации, сепак, кога станува збор за настани и вести кои немаат елементи на истражувачко новинарство, туку нудат информации за сообраќајна несреќа, задолжително е фактите да се проверуваат и прецизно да се известува за нив со должно внимание кон семејствата на инволвираните.
Содржајност: Текстот изобилува со нови ексклузивни информации, но нивната веродостојност не може да се утврди. Очигледно е дека веста е дел од една низа на информации, односно вест во низа. Содржи бекграунд информации во првата реченица. Сосема непотребно се опишува дека глетката на местото на несреќата била ужасна и дека имало крв насекаде. Освен сензационализам и паушалност, оваа информација не врши никаква друга улога во однос на информирањето.
Коментирање: Поради нерелевантноста на информациите не може со сигурност да се утврди по кој канал доаѓаат податоците до новинарот. Така, читателот со право може да се посомнева дека делот „двајца од загинатите најверојатно се браќа“ претставува коментар на новинарот, независно од тоа како оваа информација е добиена.
Оригиналност/Плагијат: Текстот е вест во низа, која повеќе или помалку содржи информации што претходно се објавени, како, на пример, тоа дека сообраќајката се случила. Тој е оригинален, а се темели на извори кои не се наведени или, пак, се неофицијални.
Квалитет на насловот: Насловот, иако навидум е информативен, сепак, паѓа во вода откако ќе се увиди дека не постои никаков поткрепен извор во текстот, за читателот да биде сигурен дека тој наслов одговара на вистината и фактите. Авторот преку прашалникот во насловот се труди да се заштити од евентуално погрешно претставените податоци, односно евентуалната грешка во шпекулацијата за брзината со која се движеле момчињата, но, тоа дефинитивно само ја покажува несигурноста на новинарот во информациите што ги презентира, односно нивната нерелевантност.
Фотографија: Фотографијата е автентична, од сообраќајната несреќа за која се известува. Сепак, се добива впечаток дека таа е поставена само за да го засили насловот, кој не е поткрепен со потврдени информации.
Заклучок: Основна задача на новинарот е да ги проверува информациите, во секој случај, а особено кога станува збор за сензитивни информации кои може да влијаат врз повеќе семејства и кога станува збор за жртви. Трката по сензација оди заедно со грешките, а кога во тоа се вклучени и емотивните состојби на семејствата на жртвите во сообраќајни несреќи, таа трка води кон неетичко и неодговорно новинарство.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
еден неточен навод, за дел не може да се утврди
неверодостојни наводи
ИЗВОРИ НА ИНФОРМАЦИИ
има евидентирани извори
неофицијални, аноними
нерелевантни
1 извор
не застапуваат страна
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
не може да се утврди
лажни информации
не аплиактивно
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
информира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови