Во овој случај, целта е јасна – да се релативизира сè она што се случува во овој миг во државата и на конкретниот настан да му се даде сосема друга димензија.

Линк до оригиналниот напис: Мијалков: Нема прошка за никого, законите се строги

Датум и време на објавување: 20.02.2015, 17:48

Датум на рецензирање: 24.02.2015

Рецензент: Александар Писарев

УА ШНАЈДЕРИ

Кога сме во кино и во моментот гледаме на филмското платно дека се исечени некои битни секвенци, публиката вика „уа шнајдери“. Во овој случај публиката молчи, а шнајдерите толку го прекроиле „филмот“ што ни оние кои веќе еднаш го виделе, не можат да го препознаат. Ако на „шнајдерите“ тоа им била целта, тогаш работата успешно си ја завршиле.

„Филмот“ кој треба да им се допадне на граѓаните ја обработува содржината на „третата бомба“, која е објавена од опозицијата и се однесува на настанот од јуни 2011 година, кога е уапсен лидерот на политичката партија Обединети за Македонија, Љубе Бошкоски. Со објавување на телефонските разговори помеѓу директорот на УБК, Сашо Мијалков, и уредникот на телевизијата „Сител“, Драган Павловиќ-Латас, и со сопственикот на телевизијата „Канал 5“, Емил Стојменов, на виделина излегле не само притисок и влијание на медиумите од страна на државен орган, туку и омраза кон политичкиот противник, суетата на соговорниците, чиј разговор е презентиран, и повреда на серија законски прописи и на Уставот на Република Македонија.

МОНТАЖЕРИ

Секвенци од снимениот разговор, кои се непобитни факти, се скриени од јавноста, а измонтирана е содржината која треба читателите да ги одведе на крив пат и да им се измие мозокот. Како низ инка им се става во главата дека сè што слушаат надвор од некои медиуми е лага и предавство против татковината. Односно, дека тоа што тие не го објавиле не се ни случило.

Со строга селекција само на делови од снимениот разговор, се соопштува пропагандна порака која треба да потврди вмешаност на Љубе Бошковски во криминал, а со повикување на „аналитичарите“ да се потврди „регуларност“ на изборите и да им се измие образот на шефот на УБК, Сашо Мијалков, министерката за внатрешни работи, Гордана Јанкуловска, шефот на кабинетот на премиерот Никола Груевски, Мартин Протоѓер, и на нивните мегафони од телевизијата „Сител“ и „Канал 5“, Драган Павловиќ – Латас и Емил Стојменов. И притоа да се дискредитира лидерот на опозицијата, Зоран Заев, и да се прикаже како манипулант кој сака да го заштити Љубе Бошкоски. Главниот момент во целата приказна е „правдата и почитување на законот“ од страна на оние кои во овој случај ги прекршиле сите законски и етички норми.

„Нема прошка за никого, законите се строги… ова го вели шефот на УБК Сашо Мијалков во разговорот со уредникот на „Сител“ Драган Павловиќ Латас во рамките на материјалите од снимените разговори.
Според домашни аналитичари оваа снимка што денес ја објави лидерот на опозицијата Зоран Заев, изборите биле регуларни при што било нагласено строго почитување на законските правила.“

САМО ЗА 18+

Во овој текст како да не е важно дали некој прислушувал илјадници граѓани полни четири години, не  се важни жртвите на овој нелегален план, не е важно дали новинари, полицијата, нарачувале судски одлуки и режирале апсења какви сакале. Не е важно што со тоа се урива правниот и уставниот поредок на државата.

Во информацијата се скриени најважните сегменти од разговорот помеѓу шефот на УБК, Сашо Мијалков и новинарот Драган Павловиќ-Латас во еден разговор и Мијалков и директорот на телевизијата „Канал 5“, Емил Стојменов, од кои се гледа целото неетичко однесување на полицијата кон уапсениот несреќник, скриено е изживувањето на полицијата пред камерите, скриена е изјавата во која шефот на тајната полиција веќе му одредила на Бошкоски затворска казна, што е еклатантен пример на кршење на презумцијата на невиност.

Скриени се цели елементи од апсењето како што е опишано во овој опис.

„Лежеше 40 минути на земја доле на улица како говедо со свртрена глава кон клозетот. Еј говедо едно, маме у п… да му е… 

Осум години ќе му биде ова, да знаеш!…

Легнување на асфалт може, ама Пуки или некој од другиве му бутале пиштол во уста…“

Колку примитивизам и нечовечност има во деловите од тој разговор и со какво уживање соговорниците ги коментираат настанот. Каков е моралот на соговорниците кои се во дилема дали го пуштат снимениот материјал во кој се прикажува пикање пиштол в уста на несреќникот, со што се загрозува неговиот живот и се нарушува неговото човечко достоинство.

Сè ова зборува за очигледно неетичкото однесување од страна на полицијата и тоа пред телевизиските камери, со што е прекршена уставната одредба од членот 11 од Уставот, членовите 80,81 и 85 од Законот за полиција, член 37 и 38 од Кодексот на полициска етика, кои забрануваат нечовечно постапување при апсењето. Има индиции дека со повредување на правните акти, се прави кривично дело. Дали учесниците во разговорот, кои договараат да се сопрат автобусите со луѓе кои сакаат да протестираат, знаат дека, според член 21 од Уставот, „граѓаните имаат право мирно да се собираат и да изразуваат јавен протест без претходно пријавување и без посебна дозвола“?

И дали непотпишаниот автор на овој текст чул за Кодексот на новинарите на Македонија, чии основни одредби се, исто така, прекршени?