Рецензија: Мехмети: Пендаровски се обидува да им се допадне на ДУИ, но тоа не е тоа
Објавено во Рецензии
on 6 - 03 - 2014 Автор: Оливера ВојновскаВо веста насловена „Мехмети: Пендаровски се обидува да им се допадне на ДУИ, но тоа не е тоа“, со нагласена тенденциозност е пренесена изјавата на пратеничката од ДУИ. Притоа, се манипулира со тоа што Мехмети јавно го кажа во Прес-центарот во Собранието, па во насловот се пласира една конструкција која, фактички, е дезинформација. Тоа се прави со јасна намера да се дискредитира кандидатот на опозицијата за претстојните претседателски избори.
Линк до оригиналниот напис: Мехмети: Пендаровски се обидува да им се допадне на ДУИ, но тоа не е тоа
Датум и време на објавување: 5.03.2014, 16:29
Датум на рецензирање: 6.03.2014
Рецензент: Оливера Војновска
ПРОИЗВОЛНО ТВРДЕЊЕ – КОМЕНТАТОРСКИ СПИН
Веста е како „пресечена“ со нож. Таа се темели на еден фрагмент од изјавата на Мехмети, кој што е точно пренесен:
Номинацијата е друго прашање, а кандидатот како личност е друго прашање. Ние говориме за процеси и концепти, не говориме за конкретни кандидати. Имаме кандидати, и некои се чини како да се обидуваат на некој начин да ја рефлектираат идејата, но тоа не е тоа“
Токму овој дел од нејзиниот исказ го пренесоа речиси сите медиуми.
И тука завршува вистинитоста на овој материјал.
Веќе во следниот пасус од веста се манипулира со изјавата на пратеничката. Имено, произволно се толкува дека „Мехмети мисли на Стево Пендаровски“. А потоа, на публиката како генерална вистина и се сервира целосно непоткрепеното тврдење, дека тој „уште пред да биде официјализиран како кандадат почна да им се додворува на Албанците во надеж дека ќе направи нешто повеќе на изборите со нивните гласови“ . Што несомнено е направено намерно, за да се оправда конструкцијата искажана во насловот: „Мехмети: Пендаровски се обидува да им се допадне на ДУИ, но тоа не е тоа“.
Нема поента да се разгледува содржајноста на оваа куса вест, која на читателите уште во насловот им подметнува невистинита информација. Со свесното пласирање невистини за кандидатот на опозицијата, се покажува наклонетост кон другата политичка опција. Вториот дел од веста, всушност, е коментаторски спин.
НЕВИСТИНА ВО НАСЛОВОТ
Насловот е најпроблематичен елемент на оваа куса вест. Во него свесно е пласирана невистина. Тој е така интониран што делува прилично омаловажувачки за личноста на Пендаровски. Згора на сѐ, даден е во форма на цитат од изјавата на Мехмети, како таа експлицитно да го посочува Пендаровски. Што не е точно. Мехмети во изјавата воопшто не споменува поименично ниту еден од кандидатите. Впрочем, дел од медиумите ја пренесоа реакцијата на Мехмети , која на својот фејсбук профил напиша дека не мисли на опозицискиот кандидат: „Стево Пенадаровски НЕ Е консензуален кандидат“ .
Во овој материјал нема говор на омраза, но конструкцијата на крајот од веста дека Пендаровски, наводно, „им се додворувал на Албаците“ за да ги добие нивните гласови , прозвучува навредливо.
Идејта на веста што ја рецензираме не е да пренесе точна и објективна информација, туку да му наштети на претседателскиот кандидат на опозицијата. Дезинформацијата во насловот и начинот на кој е скроена веста укажуваат на еден лош новинарски производ, кој остава впечаток дека е ставен во функција на политичка пресметка за изборни цели. Ова е во спротивност со професионалните новинарски стандарди, кои подразбираат обезбедување дистанца од политичките субјекти, како и избалансирано и непристрасно известување од изборите.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови