Класична дезинформација
Објавено во Рецензии
on 24 - 08 - 2015 Автор: Владимир Мирчески
[Рецензија: Лежел на улица во крв – мигрант прободе полицаец кај Гевгелија]
Пласирање вест неточна „до коска“. Не само што со ваквото непроверено „кроење“ на еден настан се заблудува публиката, туку и се придонесува за појава на негативни чувства кај јавноста во еден крајно сложен и тензичен период низ кој минува државата.
Линк до оригиналниот напис: Лежел на улица во крв – мигрант прободе полицаец кај Гевгелија
Датум и време на објавување: 21.08.2015, 09:49
Датум на рецензирање: 24.08.2015
Рецензент: Владимир Мирчески
„ТРЧАЊЕТО“ ПО СЕНЗАЦИЈА ДОВЕДЕ ДО ДЕЗИНФОРМАЦИЈА
Во овој материјал прекршено е светото новинарско правило – да се објавуваат вистинити и проверени информации. На крајно сензационалистички начин се пласира преземена вест за наводен напад врз полицаец во Гевгелија, за кој е одговорен мигрант, а сето тоа е „зачинето“ со пластичен опис како „полицаецот се тресел во грчеви и лежел на улица во крв“. Но, вистината не може да биде подалеку. Точно е дека има повреден полицаец, но не од мигрант, туку од самиот себеси – се сопнал од заштитна ограда и паднал врз столпчиња што ги штитат тазе насадените палми во близина на гевгелиската железничка станица. Нема ниту „м“ од мигрант напаѓач, ниту „н“ од нож. Иако, како што веќе рековме, станува збор за преземена информација, тоа сепак не е валидно алиби за објавување непроверена, а од суштинска гледна точка, исклучително лесно запалива вест во сложени околности кога дел од јавноста е сензитивна за прашањето за мигрантите и за нивното присуство и транзит низ Македонија. Проблемот и без тоа е голем, и за несреќните мигранти и за државата, и секако дека нема потреба од дополнително „долевање масло на огнот“.
Новинарот треба да објавува точни, проверени информации и нема да прикрива суштински податоци и да фалсификува документи. До колку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно – член 1 од Кодексот на новинари.
Јасно е дека оваа, така да ја наречеме, еснафска процедура на проверка, не била запазена и затоа резултатот е таков каков што е – груба дезинформација.
И други портали се „лизнале“ на оваа информација, но подоцна тоа го признаваат и се поправаат. Некои, пак, слепо не полетале по основната вест, туку прво ја провериле кај најповиканата институција – МВР, кое јасно соопшти дека таков настан, односно напад на мигрант врз полицаец, воопшто не се случил. Ете што се случува кога се користи само еден, ама не многу доверлив, извор за ваков потенцијално многу значаен настан.
Затоа, може да се заклучи дека не е сè во брзината, има „нешто“ и во вистинитоста.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
неофицијални
1 извор
СЕОПФАТНОСТ
несеопфатнo
прикриени информации
ПРИСТРАСНОСТ
не
извртување на вистина (спин)
лажни информации
Не може да се утврди
КОМЕНТИРАЊЕ
нема коментаторски елементи
ПЛАГИЈАТ
преземена вест
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
не директно
нема говор на омраза
не потикнува на насилство
дискриминира
национална дискриминација
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови