Рецензија: Како лидерите на СДСМ поднесуваат пораз: Заев најкукавички, Бучковски најдржавнички
Објавено во Рецензии
on 6 - 05 - 2014 Автор: Југослава ДуковскаТекстот е политички памфлет, а не новинарски текст и може слободно да се смести во категоријата дискредитирачки написи за ликот и делото на претседателот на Социјалдемократскиот сојуз, Зоран Заев, со кои изобилува македонскиот медиумски простор во постизборниов период.
Интересен по својата структура и според замислата – споредба помеѓу изјавите на лидерите на СДСМ дадени после секој од парламентарните избори во Република Македонија од 2006 година до годинешните. Секој од изборните циклуси во овој период Социјалдемократскиот сојуз ги помина со различна личност на чело на партијата и споредбата на нивните официјални изјави после секој изборен процес се чини интересна за анализа. Меѓутоа, мотивот за објавување на текстот воопшто не е некаква постизборна споредбена анализа и со тоа читателот е начисто веќе со самиот наслов и со читањето на првиот пасус. Неговата основна намена е напад врз сегашниот претседател на СДСМ и негово оцрнување, со користење на навредливи и потсмешливи квалификативи и со примеси на ситење за поразот, на кои не би смеело да им се најде место во една објективна постизборна политичка анализа. Но овој текст, тоа очигледно не ни планирал да биде.
Линк до оригиналниот напис: Како лидерите на СДСМ поднесуваат пораз: Заев најкукавички, Бучковски најдржавнички
Датум и време на објавување: 28.04.2014, 12:55
Датум на рецензирање: 1.05.2014
Рецензент: Југослава Дуковска
НЕИЗБАЛАНСИРАН ПРИОД- НАВРЕДЛИВИ КВАЛИФИКАЦИИ
Фактите кои се пласирани во написот се, всушност, изјавите на партиските лидери на Социјалдемократскиот сојуз, дадени по завршувањето на изборите од 2006 година наваму. Изјавите се коректно пренесени. Сите искази кои се користат во написот можат да се најдат во пребарувањето на новинските архиви на Интернет, но не е наведено од каде точно се цитирани. Сепак, се работи за познати и повеќепати цитирани искази на наведените личности и не би требало да се доведе во прашање веродостојноста на наводите.
Написот генерално ги дава поентите на сите истапи на Владо Бучковски, Радмила Шеќеринска, Бранко Црвенковски и на Зоран Заев после четирите изборни порази на парламентарни избори. Меѓутоа, тенденциозно се користени само оние делови од нивните изјави кои одат во прилог на тезата од насловот на текстот – а тоа е дека и Бучковски и Шеќеринска и Црвенковски знаеле како да го поднесат поразот, а Заев не.
Пристрасноста не мора ни посебно да се апострофира. Насловот, како и првиот пасус на текстот, доволно зборуваат во таа насока. Написот е неизбалансиран и отворено навредлив за претседателот на СДСМ, Зоран Заев.
КОМЕНТАРИ СО ПРИЗВУК НА СИТЕЊЕ
Коментирањето во воведниот дел на текстот е непријателско и навредливо, а мета на нападот е Заев. Тоа го дава тонот на целиот напис и сиот натамошен труд точно и без цинични забелешки да се пренесат истапите на останатите лидери на Социјалдемократскиот сојуз во засебните сегменти на текстот, поради ова паѓа во вода. Со тоа, овој различен третман на различните личности во текстот само уште добива призвук на лицемерие без трага на објективност. Пристрасно коментирање има и во последната реченица на текстот: „Овие избори не ги признаваме. Бараме итно да се формира техничка влада – изјави Заев по завршувањето на изборниот молк, а потоа во седиштето настапи молк“, што звучи како авторот на текстот да се воздржувал да биде циничен и да му се сити на Зоран Заев и на СДСМ, но попуштил на самиот крај.
Насловот е лош – несоодветен и несмасен од аспект на професионални стандарди, груб и некултурен, гледано од човечки аспект. Притоа уште и – некреативен и тенденциозен.
Кога новинарскиот текст е со дневно-политичка намена, сите новинарски стандарди паѓаат во вода. Оттука, ниту добрата структура и идеја за постизборна анализа, која ја носи текстот што е предмет на рецензијава, не можат да го „исперат“ од политичката обоеност и пристрасност, која доминира.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
неофицијални
релевантни
повеќе извори
повеќестрани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови