Во брзањето да го претстави уште еден „успех“ на Владата во привлекување на странски инвестиции, медиумот не обрнал многу внимание на точноста на податоците кои се составен дел од информацијата. Воопшто не се размислувало дали има логика тоа што го пишува. Поважно било со име и презиме да се набројат членовите на владината делегација и функционерите кои присуствувале на „почетокот на изградбата на комплексот за складирање  и преработка на јаболко“, отколку да се објави точна информација колкав е навистина капацитетот на овој комплекс. Така, според она што медиумот го објавил, премиерот и делегацијата присуствувале на почетокот на изградба на еден безначаен капацитет „ ладилник со капацитет од пет тони јаболко на  фирмата „епл ленд“ од Дубаи која во него ќе инвестира пет милиони евра и ќе вработи 100 луѓе“.
И толку. Три реда за инвестиција, и 33 реда спин за премиерот и неговиот говор и за министрите од Владата. Ако е и од Дубаи, многу е.

Линк до оригиналниот напис: Инвеститор од Дубаи гради откупен центар во Ресен, сто нови вработувања

Датум и време на објавување: 28.02.2014, 16:15

Датум на рецензирање: 04.03.2014

Рецензент: Александар Писарев

Вистинитост: Вистина е дека почнала изградба на најавениот конплекс и дека таму присуствувал премиерот и цела владина делегација. Но, не е вистина  дека ладилникот ќе  има капацитет од пет тони јаболко. Новинарот очигледно бил преокупиран со премиерот и не го ни слушал претставникот на компанијата што зборувал. Па, според тоа, не може да биде ни вистина дека инвестицијата за вака мал капацитет изнесува пет милини евра. Со еден збор, информацијата не виситинита.

Извори на информации: Веста е пренесена директно од настанот.

Содржајност: Новинарот главниот акцент во содржината на целата информација го ставил на присуството на премиерот и владината делегација на настанот во Ресен и на неговиот говор. Притоа или не слушнал добро што зборувале другите, или не проверил што напишал.Така е објавена небулозна информација  дека  „ ќе биде опфатена изградба на ладилник со капаците од пет тони јаболко, чија вредност е пет милиони евра“… „после ќе продолжи втората фаза на целиот конплекс кој треба да собере десет тони јаболко и да вработи 100 луѓе“…

Според вака срочената информација се добива впечаток дека или некој фрла пари или се обидува да ги испере низ инвестиција чија реална вредност е многу помала.  Според објавеното, секој кој малку се разбира во земјоделие ќе заклучи дека изградбата на ладилник за пет тони јаболко е промашена инвестиција, особено ако за тоа се потрошат пет милиони евра. Односно, милион евра за складирање на еден тон јаболко.

Пристрасност: Евидентна е пристрасноста кон премиерот и неговата придружба при што новинарот свесно претставникот на компанијата „Епл Ленд“, Франсис Турно, го поставил на маргините и неточно ги пренел неговите зборови.

Оригиналност/Плагијат: Оригинален прилог без потпис на ваторот.

Квалитет на насловот: Насловот е предолг и сам по себе, вака како што е конципиран, тој претставува вест. Единствената цел му била да го зголеми ефектот на инвестицијата и да претстави успех на Владата.

Фотографија: Овоштарник со јаболко, фотографијата е ставена само како илустрација без легенда и без означена локација каде е снимена.

Заклучок: Новинарот за својата работа е одговорен пред јавноста. Во овој случај јавноста и информацијата од јавен интерес била запоставена, а акцентот бил ставен на протоколот за присуството на премиерот и на неговиот говор за  „сѐ поголема атрактивност на Македонија како земја со одлични услови за инвестирање“… Спинувањето отишло дотаму што сега од министерот за земјоделие првпат дознаваме дека „во ладилнкот е контролирана атмосферата  и во него јаболката ќе може да се чуваат десет месеци“. Па, зарем има некој што не знае дека во ладилникот темепературата е контролирана. Не знам за другите, но читателите од Ресен сигурно слатко се изнасмејале, читајќи го овој прилог. Пред сѐ, поради тоа што во овој овоштарски регион има десетина индивидуални земјоделци со сопствени ладилници, чиј капацитет е над 6.000 тони јаболко. Од каков јавен интерес е инвестиција за ладилник од пет тони јаболко ако знаеме дека вкупното овогодишно произвдоство на јаболко во ресен е над 100.000 тони.

Целта на прилогот била јасна, спин за владата и премиерот при што е запоставен јавниот интерес. Не знаеме кој прв згрешил. За несреќата биде уште поголема, повеќето медиуми, трнувајќи по праксата на „Ресавската школа“ веста си ја препишувале еден од друг па така фелерична е објавена на уште десетина портали. Некои медиуми, пак, точно го слушнале  Франсис Турно кога кажал дека се гради ладилник за 5.000 тони јаболко и така ја пренеле информацијата.

И, што правиме сега со оние илјадници читатели кои се погрешно информирни и живеат во убедување дека таму некој од Дубаи има толку многу пари за фрлање што за ладилник од пет тони јаболко ќе потроши пет милиони евра. А, според она што сите ресенчани го знаат, а и ние го проверивме во Ресен, пазарната цена на изградба на ладилник со капацитет од 100 тона се движи околу 60.000 евра.

Замислете ја сликата пред кооперација во Ресен кога едната група овоштари кои ја прочиатле информацијата на првите десетина портали дека ладилникот е со капацитет од 5 тони, ќе почнат да ги убедуваат во „вистинитоста“ оние што веста ја прочитале на другите десет портали кои пренеле точна информација дека ладилникот е со капацитет од 5.000 тони.

Единственото решение во ваков случај е да се испочитува член 3 од Кодексот на новинарите на Македонија и медиумот да им се извини на 44.000 посетители кои прочитале погрешна информација.

Член 3. 

Новинарот ќе настојува да биде обезбедено објавување на исправка, деманти и одговор, во случај кога ќе биде утврдена неточноста на информацијата.

Прекршен е и член 1. од Кодексот на новинарите на макеоднија

Член 1. 

Новинарот треба да објавува точни, проверени информации и нема да прикрива суштински податоци и да фалсификува документи.