Класичен пример за манипулација каде е преземена една сатирична информација од сајт со таков профил и содржина и потоа таа е спакувана како вест! „Веста“ со сензационалистички  наслов го доведува во заблуда читателот дека  на римскиот аеродром навистина се случил таков „настан“. На социјалните мрежи има коментари  во кои се протестира поради „апсењето“ на капитенот на македонската фудбалска репрезенатција. Во написот нема ниту една ограда. Никаде не е наведено дека се работи за преземена вест од  портал за сатира и измислени вести, туку дури на крајот од страницата, долу кај таговите, како извор е посочен овој сајт.

Линк до оригиналниот напис: Горан Пандев уапсен на аеродромот во Рим по потерница од ФФМ

Датум и време на објавување: 17.10.2013 – 11:23

Датум на рецензирање: 17.10.2013

Рецензент: Оливера Војновска

Вистинитост: Написот нема апсолутно никаква допирна точка со вистината и е во спротивност со новинарските стандарди. Онака како што е пласирана „веста“,  очигледно е дека намерата на медиумот не била да ја информира јавноста, туку да ја шокира, да го привлече вниманието на читателот и да го наведе на погрешен заклучок. Што несомнено претставува демонстрација на отсуството на одговорност кон јавноста.

Извори на информации: Како извор е наведен порталот за сатира и измислени вести, кој, пак, според профилот, не може  да биде извор за ваква бомбастична информација.

Содржајност:  Тука и не може да се говори за некаква содржајност. Се работи за целосно преземен текст. Во него нема никакви нови елементи кои на читателот ќе му дадат јасна слика за твдрењето во насловот.

Пристрасност: Лажна информација. Едноставно нема сериозен новинарски пристап.

Оригиналност/Плагијат: Комплетна копија. Текстот е целосно преземен и во иста форма како што е објавен на порталот за сатира и измислени вести Коза Ностра.

Иако, на крајот е наведено дека авторството на оваа „вест“ му припаѓа на порталот што ја објавил, манирот во кој таа е напишана наведува на помислата дека се работи за текст „подметнат“ на читателите како да е вистинска вест.

Квалитет на насловот: Насловот без никакви измени е преземен од сајтот за сатира. Тој е сензационалистички и на прв поглед делува шокантно.

Фотографија: Написот е илустриран со две фотографии (едната, објавена и на оригиналниот текст е фотошоп), кои треба да  „посведочат“ дека  Пандев е уапсен! Тие се соодветни на манипулативното ниво на оваа фабрикувана „вест“.

Заклучок:  Порталот на читателите  им понудил крајно манипулативна информација, особено насловот. Впечаток е дека вака спакуваната „вест“ има за цел  да ја привлече публиката со сензационализам. Притоа се потценува интелигенцијата на читателите дека овој новинарски фабрикат може да се протне како медимуска приказна. Што претставува манифестација на дрскост и невкус и во никој случај не може да се оправда со лежерниот третман на темите во рубриката Ракурс, каде што е објавена „веста“. Написот е дискутабилен и од аспект на чесниот пристап на медиумот кон своите конзументи. Тој  е пример за злоупотреба на довребата на читателите, кои од информативните портали очекуваат да добијат навремена и вистинита информација, а не шеги , мајтапење, фотомонтажа и празен сензационализам.  Сајтот пак, каде што изворно е објавен текстот, на читателите им посакува „добредојде во светот на сатирата и измислените информации“, така што  веднаш станува јасно за какви „вести“ се работи.