[Рецензија:  ФФМ: Суперкупот ќе ја промовира Македонија во светот, имавме апсолутна поддршка од Владата и државните институции]

„Пронајдете го натрапникот“ – така би го нарекол овој материјал. Имаме релативно коректен текст, кој, севкупно гледано, губи, и тоа исклучително, само поради еден аспект, а тоа е употребената фотографија. Некој ќе рече малку е само поради тоа целиот производ да биде лошо оценет. Јас на тоа ќе одговорам: „Погледнете ја фотографијата и сè ќе ви стане јасно“.

Линк до оригиналниот напис: ФФМ: Суперкупот ќе ја промовира Македонија во светот, имавме апсолутна поддршка од Владата и државните институции

Датум и време на објавување: 30.06.2015, 15:36

Датум на рецензирање: 02.07.2015

Рецензент: Владимир Мирчески

ПРОНАЈДЕТЕ ГО НАТРАПНИКОТ!

Ова е пример за тоа како целиот труд паѓа во вода поради лошо избрана и пласирана фотографија. Навистина не знам што се барало да се чепка во фотоархивата и да се извлече слика која нема врска со темата што се обработува во написот? Хм, но дали навистина е така, дали е превид, брзање? Не би рекол. Имаме јасна намера и цел од еден исклучително позитивен настан да се направи и политичко-партиска реклама. Како поинаку би се аргументирало мешањето на премиерот таму каде што не му е место. Внимавајте, Скопје ја добива организацијата на Суперкупот на УЕФА за 2017 година и не само што за илустрација го добиваме стадионот каде ќе се одржи натпреварот, туку и првиот човек на Владата како од претседателот на ФФМ добива фудбалски дрес со неговото име. Прво, станува збор за бајата фотографија, второ што, пак, премиерот во конкретниот случај има врска со УЕФА и со фудбалот? Никаква. Во текстот никаде и не се споменува неговото име и оттука дилемата, или нелогичноста, зошто со таква фотографија да се „зачини“ текстот. Можеби ако се каже „Влада“ се мисли само на нејзиниот шеф? Ок, во написот се цитира изјавата на претседателот на ФФМ, ама, па, се морало ли, по секоја цена, да се стави слика од него и од премиерот? Како да нема Илчо Ѓорѓиоски други фотографии во својство на претседател на федерацијата. Во новинарството подолг период се води дебата за (зло)употребата на дигиталното време од политичарите. Еве еден сегмент од интересен текст на таа тема (примерот е од Канада):

„Во дигиталното време новинарите стануваат поподложни на „спакуваните“ видувања на политичарите кои надлежните за фотографиите ги туркаат во обид за заобиколување или влијание врз меинстрим-медиумите… Овие фотографии се наменети за врамување на субјектот во позитивно светло и за промовирање на стратешки имиџ.“

Токму тоа го имаме во овој случај. Обид за т.н. „врамување“ на премиерот во светло на позитивниот настан – добивање на организацијата на Суперкупот 2017. Потврда дека навистина се работело за политички фотореклама. Некои паметни од ова одамна направиле добар бизнис, па дури и упатства како тоа да се стори. Ако ова некому не му е доволен аргумент, ќе понудиме уште еден, секако од новинарски аспект, аргумент дека материјалов е „местенка“. Насловната конструкција јасно ја исцртува нишката-водилка по која некој одел при креирањето и при визуелизрањето на продуктот. Од целите два, и тоа доста долги, пасуса, цитати на претседателот на ФФМ, во насловот место, секако, нашла и неговата благодарност до Владата:

„ФФМ: Суперкупот ќе ја промовира Македонија во светот, имавме апсолутна поддршка од Владата и државните институции“

Сметам дека целото пакување, пред сè, со фото-илустрацијата, е во колизија со сегменти од Кодексот на новинари:

Новинарот мора да обезбеди професионална дистанца од политичките субјекти – член 14.

Што повеќе да се каже. Навистина, ако се може „дури и од фрижидер да ни излезе ликот на премиерот“.