[Рецензија: ЕК го објави договорот ова се деталите]

Тоа што го има во насловот на овој тенденциозен и манипулативен прилог, го нема во неговиот содржински дел. Деталите од извештајот на експертската група на Европската комисија, кои се најавуваат со насловната конструкција, не може да се пронајдат во написот. Но, затоа таму има „монтирани и сечени разговори“, како и „соросоиди во техничка влада“!

Линк до оригиналниот напис: ЕК го објави договорот, ова се деталите

Датум и време на објавување: 20.06.2015

Датум на рецензирање: 21.06.2015

Рецензент: Оливера Војновска

ДОКУМЕНТОТ НА ПРИБЕ, УСПЕХ ЗА ВЛАСТА!

Материјалот што го рецензираме се повикува на неименувани дипломатски извори и на официјален документ –  Извештајот што го изготви  експертскиот тим на Европската комисија по два месеца престој во државата.

Меѓутоа, тој не ги користи фактите од извештајот и не им ги посочува на гледачите, па тие самите да проценат до какви заклучоци дошле експертите од ЕК, предводени од поранешниот директор на Директоратот за Западен Балкан, Рајнхард Прибе.

Туку, преку една субјективна перцепција, ги извртува нештата и го изместува фокусот од главните поенти на документот, обидувајќи се да го претстави како успех за власта!

Во прилогот, на пример, воопшто не се спомнува дека во извештајот е наведено дека снимките од прислушувањето:

„…според квалитетот, опсегот и бројноста потврдуваат дека се направени во просториите на национлната разузнавачка служба. Содржината на многу од снимките упатува на индикации на незаконски активности и на злоупотреба на моќта од страна на вискои владини службеници…“

„…УБК работи надвор од својот законски мандат во полза на власта за да ги контролира носителите на високи функции во јавната администрација, обвинителството, судиите и политичките противници, како последица на што се вмешува во независноста на судството и на другите национални инситуции…“

 Наспроти ова, написот на самиот почеток има манипулативен пристап, па вели:

„Европската Комисија ја заврши првичната истрага и анализа во врска со Македонската криза и објавените материјали кои се добени со прислушување без знаење на МВР, а потоа се дадени на СДСМ и Зоран Заев кој со сечење и монтирање ги објавува повеќе од 3 месеци“.

Тоа остава впечаток како да е општо прифатено мислењето дека снимките се лепени – конструирани.

„СОРОСОИДИ“ ВО ТЕХНИЧКА ВЛАДА!

Прилогот кој наводно нуди „детали“, не кажува дека во извештајот испишан на 20 страници се идентификувани недостатоци во пет сфери, и тоа: следење на комуникациите (прислушувањето), судството и обвинтелството, контролата – надворешен надзор од независни органи, изборите и медиумите.

Во него нема ниту збор за тоа дека во експертскиот извештај се изразува загриженост за несоодветното раздвојување помеѓу државата и партиските активности, за индиректната контрола на владејачката партија врз медиумите поради државната доминација во рекламниот маркетинг, за тоа дека медиумите работат во атмосфера на страв, дека приватните сопственици и ризикуваат владејачките политички сили да им се одмаздат ако не ги поддржат нивните агенди.

Нема сомнеж дека материјалот што го рецензираме, намерно не ги регистрира острите критики искажани во извештајот. Тој, всушност, воопшто немал намера да биде објективен и нагласено се труди владејачката ВМРО-ДПМНЕ, но и ДУИ и ДПА, да ги прикаже како конструктивна страна во преговорите, која е на иста линија со Европската комисија и со еврокомесарот Хан:

„Според она што го дознава Сител, ВМРО-ДПМНЕ и ДУИ и по ова прашање (техничка влада) се согласни со Еврокомесарот Хан и Европската Комисија…“

А на другата страна е лошата опозиција, која задолжително оди во пакет со „соросоидите“, кои, пак, се најзаинтересирани за техничката влада, а СДСМ,  всушност, „им е само инструмент за да дојдат до целта“!

Видливо е дека целиот концепт на прилогот е ставен во функција на  поддршка на власта и, истовремено, сугерира мислење дека актуелната политика наидува на поддршка и кај европските авторитети. Иако е доволно само да се отвори линкот и да се види какви се вистинските пораки од Брисел. А, тие немаат допирна точка со наводите во овој  пристрасен коментаторски скорен прилог, скаран со принципите на етички исправното новинарство.