Манипулација со лековерните граѓани
Објавено во Рецензии
on 8 - 09 - 2015 Автор: Александар Писарев
[Рецензија: Дијабетес и ракот се измислени болести !]
Во деведесеттите години на минатиот век, Алан Чумак, контроверзиниот Русин-Украинец чие вистинско постоење во светот на алтернативна медицина никогаш не е докажано, ги лекуваше луѓето преку своите фотографии објавени во весниците. И, знаете ли колку луѓе се фатија на таа глупост? Се прашувам, тогаш да постоеја интернет и „Фејсбук“, дали ќе лекуваше и преку нив. Како било, со неговите фотографии медиумите во поранешната СФРЈ и на Балканот неверојатно многу ги креваа тиражите. Текстот кој го рецензираме ме потсетува на тоа време.
Линк до оригиналниот напис: Дијабетес и ракот се измислени болести !
Датум и време на објавување: 3.09.2015
Датум на рецензирање: 7.09.2015
Рецензент: Александар Писарев
НОВА СЕНЗАЦИЈА ЗА НАИВЕН НАРОД
Читајќи го внимателно текстот што е предмет на рецензија, не можеме да ја исклучиме веројатноста дека постојат и луѓе кои можат да поверуваат на сè ова што е објавено под сензационалистичкиот наслов: „Дијабетесот и ракот се измислени болести“ и дека со тоа се доведени во опасност. Се работи за манипулација со лековерните граѓани, кои лесно наседнуваат на приказните за чудотворци, бајачки и за исцелители.
Содржински, текстот тешко може да се смести во некој новинарски жанр, бидејќи се работи за украдено интервју и за плагијат од сличен бугарски портал, „Петел“, што новинарот, кој не се потпишал под текстот, како извор требало да го посочи, почитувајќи го предупредувањето дека преземање на оваа содржина без одобрение и без повикување на изворот не е дозволено. Згора на тоа, преводот е лош, конфузен и на неколку места неточен.
„ВАСИОНСКИ“ БРАТ
Текстот е сензација за наивен народ и еден е од серијата слични текстови на слични портали, кои се преплавени со разни гатачи, исцелители и со слични измамници, чија единствена цел е заработка на туѓа мака. Името на Иван Павлович Неумивакин во научните кругови е проблематично и, главно, е присутно на порталите и во медиумите кои заработката ја остваруваат преку разни семинари, повикувајќи се на методите на овој и на слични „алтернативци“.
Во текстот има и доста матерјални грешки што укажува на низок степен на едукација на авторот, бидејќи не прави разлика меѓу медицина за космонаути и „Космичка медицина“, како гранка на алтернативна медицина со која се „бави“ Неумивакин, чие интервју е преземено од посочениот бугарски портал, па го претставува како „Научник кој ја создал медицина за космонаути“, што не е точно.
РЕЦЕПТОТ Е ОПАСЕН !
Кога постои недостиг од знаење, а за жал и недостиг од доверба во надлежните институции и во луѓето кои работат во нив, граѓаните се подложни на манипулации. Медиумот наместо да го штити јавниот интерес и да ги одврати од штетата која можат да им ја направат „чудотворците“ за разни болести, им „продава“ решенија и рецепти кои се крајно проблематични, неиспитани, екстремни и често опасни, а во текстот придружени со категорично тврдење дека се ефикасни и делотворни. Без многу размислување, се пласира тезата на соговорникот за заштита на имунолошкиот систем со пиење вода со хидроген, авторот не објаснува во колкаво количество, со кој процент на хидроген, што може да биде опасно за тој што ќе посака да се лечи на овој начин.
„На чаша вода можете да капнете по 5-10 капки хидроген пероксид… кислородната вода е потребна за да работи заштитниот имунолошки систем, тој ги убива и доубива сите наши внатрешни непријатели.“
НЕПОЧИТУВАЊЕ НА КОДЕКСОТ
Ако се оградиме од формулите и од рецептите на „научникот кој ја создал медицината за космонаути“, кои авторот само ги пласирал, неговата повреда на Кодексот на новинарите на Македонија е содржана во членовите 4. и 12. кои гласат:
Членот 4.: Новинарот ќе го назначи изворот на информациите.
Член 12.: Плагијаторство е неприфатливо. Цитатите не смеат да се користат без да се нагласи изворот или авторот.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
точни наводи
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
не може да се утврди
не може да се утврди
КОМЕНТИРАЊЕ
нема коментаторски елементи
ПЛАГИЈАТ
целосна копија
ненаведен автор
КВАЛИТЕТ НА НАСЛОВОТ
дезинформира
некреативен
сензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови