КОНТЕКСТ (contextus, лат.) – врска на еден израз, содржина во целина, вкупна смисла која не смее да се изневери со издвојување и опишување на кој било дел во однос на главната содржина и карактер на целината; пораките можат да се разберат само во рамките на контекстот.

Е, токму тоа е прекршено во оваа куса вест, односно имаме пример на погрешна употреба на изјава на еден поединец со тоа што во насловната конструкција се опишува како да станува збор за позиција на една цела, и тоа многу сериозна и важна, институција. Контекстот на настап на единка-политичар и изместен со тоа што е претставен како став на меѓународна организација.

Линк до оригиналниот напис: Брисел: Македонија е лидер на Балканот во носење реформи

Датум и време на објавување:   16.03.2014, 17:15

Датум на рецензирање:  17.03.2014

Рецензент:   Владимир Мирчески

СТАВ НА ЕВРОПРАТЕНИК НЕ Е ИСТО СО ПОЗИЦИЈА НА ЦЕЛАТА ЕУ

Текстов, како што е пренесен, го начнува прашањето на репрезентативност – дали еден пратеник на Европскиот парламент, а ги има 766, настапува во името на целата Европска унија? Имајќи ја предвид структурата на ЕУ и начинот на кој таа ги носи одлуките, одговорот е апсолутно не. Европскиот парламент секако е една од врвните институции на Унијата, но ставот на еден пратеник во никој случај не го одразува ставот на целиот парламент, а уште помалку на ЕУ како што се пласира во насловот. Европарламентарците, поради начинот на избор, а тоа се директни избори, секако дека имаат поголема слобода во настапите во однос, на пример, на членовите на Европската комисија, но тоа не значи дека нивното мислење е официјалната позиција на, како што се вели во написот, Брисел.

Всушност, станува збор за преземен текст, што е и јасно наведено, но проблемот е како е интерпретирана содржината на оригиналниот напис, пред сѐ, во насловната конструкција.

Во новинарската теорија насловот се дефинира како „најсублимирана информација не само за настанот, туку и за текстот кој известува за тој настан, прва информација за суштината, повик и највидлвива порака за читателот“.

А добар наслов е: „информативен и изразен; како најважен дел на новинарскиот текст мора да биде доследен на текстот, а тоа значи: актуелен, значаен, занимлив, точен, прецизен…“

Во овој случај тоа не е така, бидејќи европратеник не е исто што и Брисел – синоним за целата ЕУ.

„НАМЕНСКИ“ ИЗЈАВИ НА ЕВРОПРАТЕНИЦИ ВО ПРЕСРЕТ НА ИЗБОРИТЕ

Интересно, речиси без исклучок во пресрет на секои избори во последниве неколку години редовно се појавуваат разни европратеници, кои, во зависност од сопствената политичка ориентација, де ја поддржуваат едната, де другата страна во земјава. Во овој случај станува збор за член на ЕП од групата на европските народни партии – семејство на кое му припаѓа и домашнава владејачка партија. Оттука, донекаде е разбирлива, пред сѐ, политичката содржина на изјавата на овој европратеник, која не е подложна на оваа рецензија и која малку повеќе ја фаќа „десната лента“. Не верувам дека има општо мислење во ЕУ дека, како што се вели во текстов, „Македонија е лидер на Балканот во носење реформи“. Самиот факт што е консултиран само еден европратеник, и тоа потврден поддржувач на владата во Македонија, му дава одредена пристрасна нота и на оригиналниот и на овој преземен текст.

Куса вест која треба да ни каже колку земјава е добра во спроведувањето на реформите, а колку за застојот е виновна само Грција. Едностран пристап, бидејќи ако се читаат релевантните документи на европските тела, се гледа дека името не е единствен проблем во Македонија. Но, некој решил дека тоа треба така „препакувано“ и да им се сервира на читателите дополнето со јасно промашен и збунувачки наслов. Да повториме: нема знак на равенство меѓу изјава на еден европратеник и позицијата на Брисел.