Рецензии: Блазе си му на Путин со ваква моќ!
Објавено во Рецензии
on 18 - 12 - 2014 Автор: Љубомир Костовски
Станува збор за пренесена фото-вест од воените вежби на руската војска во Калининград, најзападната точка на Руската Федерација. Користена е информација која била достапна на „Ројтерс“ и која содржи вообичаени податоци за бројот на учесниците и за средствата (оружјата) кои биле дел од демонстрацијата на воената моќ и на ефикасноста на армијата. Притоа, редакцијата си ставила наслов каков не би се осмелил да стави ниту некој „патриотски“ весник во земјата каде се изведува вежбата.
Линк до оригиналниот напис: Блазе си му на Путин со ваква моќ!
Датум и време на објавување: 16.12.2014, 11:58
Датум на рецензирање: 17.12.2014
Рецензент: Љубомир Костовски
„Рускиот претседател Владимир Путин наредил кон почетокот на месецов да се одржи вонредна воена вежба на западот од земјата. Вежбата е реализирана од 5 до 10 декември, соопшти денес руското Министерство за одбрана. Во соопштението се наведува дека вонредната вежба во која учествувале 9.000 војници и повеќе од 55 воени бродови, е спроведена за да се тестира борбената готовност на војската во Калининград, област која се граничи со членките на НАТО, Литванија и Полска.“
Како и секоја професионална агенција, „Ројтерс“, секако, не би си дозволил да известува од воена вежба така што да сугерира некаква (чија било) воена надмоќ. Текстот е и строго професионален, но уредништвото на дневниот весник си дозволило заклучок врз база на непостоечка анализа да сугерира, а тоа е очевидно, нечија воена надмоќ, пред сè, на Москва. Значи, за да се заклучи дека некој има надмоќ, треба да се даде некаков опис од каде таквиот резон произлегува (воената моќ на замислениот противник).
Во насловот дури има и извесно „насладување“, кое, пак, е недозволиво за дневен весник со традиција, бидејќи го имаме и наднасловот „Подготвени за војна“. Ова, сè на сè, како да дејствува воено-поттикнувачки! Прегледот на другите извештаи (преноси на веста на „Ројтерс“) е далеку поумерен. Има, секако, и полоши примери, каде се сугерира дека некој дури и бил директно таму! Навистина, на споменатиот портал имаме и закачена видеовест од пропагандната телевизија „Раша тудеј“, во траење од две и пол минути, со што се комплетира едно неприкриено навивање.
Да потсетиме дека официјалната политика на земјава е да станеме член на НАТО, а ние веќе и учествуваме во дел од тренажно-оперативните операции на Алијансата со „жива војска“ подолго време. Ако има промени во таа политика, веројатно јавноста заслужува информација.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
вест на призната светска агенција
СЕОПФАТНОСТ
сеопфатнo
нема прикриени информации
ПРИСТРАСНОСТ
не може да се утврди
извртување на вистина (спин)
има извртување на фактите
наклонетост
политичка пристрасност
КОМЕНТИРАЊЕ
Насловот е коментаторски и пристрасен
ПЛАГИЈАТ
целосна копија
наведен извор без линк
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
се работи за фото вест
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови