По секоја цена да се нападне посредникот Ванхауте!
Објавено во Рецензии
on 25 - 02 - 2016 Автор: Александар ПешевНиту една изјава, ниту еден официјален извор на информации. Се земаат објави на социјалните мрежи кои се коментираат за извртување на вистината со крајна цел – лична дискредитација на посредникот Питер Ванхауте. Во написот кој не ги задоволува професионалните новинарски стандарди, се забележува нагласена политичка пристрасност.
Линк до оригиналниот напис: Туристот Ванхауте продолжува со навредите врз македонскиот народ и историја
Датум и време на објавување: 22.02.2016, 11:06
Датум на рецензирање: 22.02.2016
Рецензент: Александар Пешев
КРИТИЗИРАЊЕ
Од самиот почеток се открива политичката пристрансост. Посредникот во преговорите за спроведување на договореното во Пржино, во насловот од објавата и во првите пасуси, се декларира како турист, што е партиски став на ВМРО-ДПМНЕ. Брисел го нема повлечено Ванхауте од неговата функција, со што тврдењата дека тој е турист се неосновани.
Коментирањето е главна компонента од првата до последната реченица во текстот.
Питер Ванхауте, кој што дојде како медијатор, а продолжи како турист, не сопира со навредите врз македонскиот народ, историјата, општеството, политичките неприлики за кои сесрдно се заложи да не се решат, напротив стори се за да влетаат во ќорсокак.
Кој го вели ова? За чиј став станува збор? Вреди да се нотира употребата на формулации кои претходно на јавноста ѝ беа презентирани во партиско соопштение на ВМРО-ДПМНЕ:
Што се однесува до ВМРО-ДПМНЕ, Питер Ван Хауте од денеска е турист во земјава и може да му препорачаме да го посети Музејот на македонската револуционерна борба. (соопштение на ВМРО-ДПМНЕ)
Дополнително, написот што е предмет на оваа рецензија си зема слобода да говори во името на пошироката јавност, преку дискредитација на твитер-заедницата.
Неговите „мачки и кучки“ преку кои се обидува да го исмее целиот процес наидува на одобрување само кај мал дел од „твитер заедницата“ која ниту е репрезент на македонската јавност, ниту пак е реална слика за хуморот на Ванхауте.
НАГЛАСЕНА ПРИСТРАСНОСТ
Политичката пристрасност се согледува и во следниов дел од текстот:
На Ванхауте не му е прв пат да напаѓа по историјата, по политичката партија зад која стои мнозинството, нејзини директни претставници на преговорите.
Не се презентирани никакви докази дека посредникот има напаѓано претставници на партијата ниту, пак, ваквото тврдење е поддржано со сведоштва или изјави од претставници на ВМРО-ДПМНЕ или очевидци. Потоа следуваат уште неколку тврдења без докази и атрибуција на изворот на информации, па повторно јасен елемент на политичка пристрасност и показател за едностраноста на написот, во форма на лекција:
За позицијата на активен медијатор најмалку би требало да се врзуваат делувања кои би оделе во насока на навреди кон репрезенти од највисоките партиски органи на ВМРО- ДПМНЕ…
Да потсетиме, во согласност со професионалните стандарди, не треба без изјави и докази да се носат заклучоци, барем не во објава од категоријата „вест“.
Инаку, во овој напис личната дискредитација на посредникот се спинува и кон јасен напад на опозицијата
Па, што ќе им е сектор за односи со јавност во македонската опозиција кога си го имаат Ванхауте. Ама од друга страна Ванхауте не може да биде олеснувач во преговорите.
ГЛУМЕЊЕ ЖРТВА
Следува низа неофицијални информации и уште еден спин видно насочен кон дискредитација на политички противници на партијата, за која веќе во овој текст јасно се навива:
Засилувањето на активностите на Ванхауте на социјалните мрежи почна по тајната средба која што Белгиецот ја имаше со претставници на СОРОС каде од него се бараше „да продолжи со притисокот“.
Нема докази за ваквото тврдење, а од публиката се очекува да прифати чаршиски муабет како доказ. Но, нападот не завршува тука:
Секако, да притиска да пропаднат преговорите, за да не се дојде до решение, за да може да продолжи кризата, да пропаднат опциите за предвремени избори на договорената дата, за да може ВМРО-ДПМНЕ да излезе „лошото момче“ во ситуацијата, за да се смени колку што е можно повеќе јавното мнение во корист на СДСМ.
Кон крајот на објавата, политичката пристрасност станува сè поочигледна. Ова е извадок од написот:
Ванхауте по неговите вербални испади и реакциите на ВМРО- ДПМНЕ барал прошка за да може да продолжи со медијаторството. Но, сето тоа се промени откако тоа од него беше директно побарано.
А, ова е дел од партиското соопштение на ВМРО-ДПМНЕ:
За жал, веднаш по барањето да му биде простено, следеа нови испади и нови навреди кон ВМРО-ДПМНЕ и граѓаните. Поради овие причини, ВМРО-ДПМНЕ веќе нема да учествува на состаноци на кои што ќе присуствува и Питер Ванхауте.
Во основа, имаме напис кој преку коментари и спинови, фаворизирајќи политички субјект, се обидува да ја презентира ВМРО-ДПМНЕ како партија – жртва на странец кој, според неоснованите тврдења во текстот, го навредува македонскиот народ за доброто на опозицијата и на дел од невладиниот сектор. Непрофесионален текст кој целосно затаиле принципите на добрата новинарска практика.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
неофицијални
нерелевантни
1 извор
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
стилски уреден
поврзан со тагови