Пита од вести, коментари, дисквалификации и од невистини
Објавено во Рецензии
on 22 - 06 - 2016 Автор: Владо Ѓорчев
[Рецензија: „Шарените“ ја нападнаа полицијата и сакаа да го урнат споменикот на Прометеј]
Ова е текст полн со квалификации и со коментари измешани со самата вест. Веднаш по масовните протести на „Шарена револуција“, вакви и слични текстови, со напади врз демонстрантите и со спинувања, се појавија и по други медиуми кои од јавноста се оквалификуни како провладини. Во конкретниот текст што е предмет на оваа рецензија, има непотврдени и неаргументирани податоци, за кои воопшто не се вложило труд да се проверат.
Линк до оригиналниот напис: „Шарените“ ја нападнаа полицијата и сакаа да го урнат споменикот на Прометеј
Датум и време на објавување: 20.06.2016, 22:30
Датум на рецензирање: 21.06.2016
Рецензент: Владо Ѓорчев
„Хулиганите предводени од Зоран Заев и СДСМ вечерва почнаа да ја напаѓаат и навредуваат полицијата. Инцидентот се случи пред Собранието на Република Македонија, односно кај споменикот на Прометеј“.
Веднаш и со квалификации почнува текстот, а притоа и се спинува. Имено, тоа не беа хулигани, туку демонстранти и не беа предводени од Зоран Заев и од СДСМ. Повеќепати во рецензиите сме објаснувале дека протестите се организирани од здруженијата на граѓани „Протестирам“ и „Шарена револуција“, а не од опозициската партија. Точно е дека СДСМ ги поддржа овие протести, но тоа никако не значи дека се предводени од таа партија.
Втората невистина е дека демонстрантите ја нападнале полицијата. Напротив, полицијата тргна кон луѓето, а тоа може да се види и од видеозаписот објавен во прилог на текстот. Вистина е, пак, дека во тој момент, кога почна потиснувањето од на полицијата, кон неа поединци фрлија шишиња со вода и други предмети. Целосно непоткрепена и неаргументирана е реченицата дека наредбата за такво нешто била издадена од Заев и од Спасовски. Тоа тврдење во текстот е „истресено од ракав“. Покрај невистините, во следниот пасус има и навреди и дисквалификации:
„Аболираниот криминалец Зоран Заев и неговиот послушник кој насилно беше внесен во МВР како технички министер, Оливер Спасовски издадоа наредба да се фрлаат пластични шишиња кон полицијата и толпата да ги навредува полицајците нарекувајќи ги убијци“.
Kованицата „аболираниот криминалец Зоран Заев“ e многу проблематична, неетична, невистинита и надвор од професионалните стандарди. Претседателот на СДСМ неколкупати потврдил дека судот ги отфрлил досега сите обвинувања во врска со „Глобал“, а и јавно побара, ако има можност да му се поништи аболицијата од 2009 година, претседателот Иванов да го стори тоа. Тоа воопшто не е ставено во текстот, со што тој губи од објективноста и од целосноста.
Што се однесува до тоа дека Спасовски бил насилно внесен во МВР, повторно станува збор за невистина. Договорот од Пржино предвидува шест месеци пред предвремените парламентарни избори во владата да влезат министри од опозицијата. Спасовски беше токму такво решение.
Без сомневање, станува збор за текст полн со неаргументирани квалификации. За такви написи нема место во новинарството, без оглед дали станува збор за нарачан текст или текст од незнаење на професионалните стандарди.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
неофицијални, анонимни
нерелевантни
не може да се утврди
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
не може да се утврди
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор, наведен извор со линк
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
манипулира
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
не апликативно
има контекстуални линкови
стилски уреден
поврзан со тагови